2 տարի առաջ տեղի ունեցած սպանության մեջ մեղադրվող, Տավուշի մարզի Թեղուտ համայնքի ղեկավարի որդու՝ Արագած Թամրազյանի գործով նախաքննությունն ավարտվել է եւ գործն ուղարկվել Տավուշի մարզի ընդհանուր իրավասության դատարան: Այս մասին NEWS.am-ը տեղեկացավ Դատական տեղեկատվական համակարգից:
Ըստ մեղադրական եզրակացության՝ Արագած Թամրազյանը հոգեկան խիստ հուզմունքի վիճակում ապօրինաբար դիտավորությամբ կյանքից զրկել է Նավասարդ Աբգարյանին, դիտավորությամբ վնասել Համլետ Բադալյանին պատկանող ավտոմեքենան:
Նշենք, որ Թամրազյանին նախկինում առաջադրված մեղադրանքը վերաորակվել է. ՔՕ 104-րդ հոդվածի 2-րդ մասի 6-րդ կետը վերաորակվել է 105-րդ հոդվածի 1-ին մաս, իսկ ՔՕ 185-րդ հոդվածի 1-ին մասը՝ մնացել անփոփոխ:
Ավելի վաղ Քննչական կոմիտեն հայտնել էր, որ 2013 թ. դեկտեմբերի 24-ին Արագած Թամրազյանն ավտոմեքենայով հետապնդել է իր եղբոր հետ վիճաբանած Նավասարդ Աբգարյանի ավտոմեքենային, որի ընթացքում հրացանից չորս անգամ կրակել է նրա ուղղությամբ: Այնուհետեւ Նավասարդ Աբգարյանը, փոխելով ավտոմեքենայի ուղղությունը, կիսով չափ բարձրացել է մայթ, իջել ավտոմեքենայից եւ որպես հետիոտն անցել ճանապարհի երթեւեկելի մաս: Արագած Թամրազյանը շարունակել է հետապնդել նրան եւ կրակել Աբգարյանի ուղղությամբ։ Ստացած հրազենային վնասվածքով վերջինս տեղափոխվել է «Դիլիջանի բժշկական կենտրոն», որտեղ ժամեր անց մահացել է:
Դեկտեմբերի 28-ին Արագած Թամրազյանին մեղադրանք է առաջադրվել եւ հայտարարվել հետախուզում: 2015թ. օգոստոսի 25-ին Թամրազյանը հայտնաբերվել եւ բերման է ենթարկվել ոստիկանություն: Նա կալանավորված է:
Ի դեպ, սա առաջին դեպքը չէ, երբ Թեղուտի գյուղապետի որդին հայտնվում է դատարանում: 2013թ. հուլիսին իրեն ամրակցված հրացանով Արագած Թամրազյանը կրակոցներ էր արձակել եւ վնասել Դիլիջանում գործող գազալցակայաններից մեկի աշխատասենյակի պատուհանի ապակիները՝ պատճառելով 34 հազար դրամ նյութական վնաս: Բացի դրանից, վնասվել էր նաեւ տարածքում տեղադրված՝ Արսեն Բաբախանյանին պատկանող սուրճի ինքնաեռ սարքը՝ պատճառելով 50 հազար դրամի նյութական վնաս:
Այս գործով դատարանը որոշել էր գործի վարույթը կարճել եւ քրեական հետապնդումը դադարեցնել:
