Դեկտեմբերի 6-ի սահմանադրական հանրաքվեի օրը կրկնակի քվեարկելու մեջ մեղադրվող 19-ամյա Գեւորգ Խաչատրյանը ընդունում է իրեն առաջադրված մեղադրանքը:
«Ես ինձ լիովին մեղավոր եմ ճանաչում»,- այսօր՝ փետրվարի 10-ին, Մալաթիա-Սեբաստիա վարչական շրջանի ընդհանուր իրավասության դատարանում ասաց մեղադրյալը:
Ֆիզիկական կուլտուրայի հայկական պետական ինստիտուտի 3-րդ կուրսի ուսանողը դատարանին միջնորդեց գործը քննել արագացված կարգով: Դատարանը բավարարեց միջնորդությունը: Դատական նիստը հետաձգվեց:
Գեւորգ Խաչատրյանին մեղադրանք է առաջադրվել այն բանի համար, որ նա 06.12.2015թ մասնակցելով ՀՀ սահմանադրական փոփոխությունների հանրաքվեին, մեկից ավելի անգամ քվեարկելու նպատակով գնացել է թիվ 8/25 ընտրատեղամաս, փորձել է նորից քվեարկել, սակայն նկատվել է հանձնաժողովի անդամի կողմից:
