Շիրակի մարզպետ Ֆելիքս Ցոլակյանն իր պաշտոնանկության մասին կարդացել է միայն լրատվամիջոցներում, այլ բան իրեն չեն ասել։
«Ես ձեր պես լրատվամիջոցներում եմ կարդում, ինձ որեւէ մեկը դեռ ոչինչ չի ասել», -NEWS.am-ի թղթակցի հետ զրույցում նշել է Ֆելիքս Ցոլակյանը։
Դիտարկմանը, թե ԿԳ նախարար Արմեն Աշոտյանն արդեն այսօր չի բացառել, որ կարող է հեռանալ ԿԳ նախարարի պաշտոնից, Ցոլակյանն արձագանքեց․ «Ուրեմն իրեն ասել են դրա մասին, ինձ ոչինչ չեն ասել։ Եթե այդպիսի որոշում լինի, ինչպես բոլորը, այնպես էլ ես կընդունեմ, կկատարեմ, ուրիշ բան չեմ կարող ասել»։
Ֆելիքս Ցոլակյանն անդրադառնալով դաշնակցականների այն հայտարարությանը, որ իշխանության հետ կոալիցիա են կազմում ծանր իրավիճակը փոխելու նպատակով, ասաց․ «Դա ասում են ընդհանուր առումով, բայց կոնկրետ մարզի մեջ աշխատանքի գործիքները չեն փոխվում, նույնն է։ Կապրենք՝ կտեսնենք»։