Այնպիսի հեղինակավոր կենտրոնը, ինչպիսին Stratfor-ն է, պետք է ստուգեր տեղեկությունը: Այս մասին հայտարարեց ռազմական փորձագետ Արկադի Գրիգորյանը՝ NEWS.am-ի թղթակցի խնդրանքով մեկնաբանելով վերլուծական կենտրոնի օգտագործած տվյալները «Օդունդաղի բարձունքի նկատմամբ վերահսկողության վերահաստատման մասին»:
«Փաստ է, որ Ադրբեջանը վաղուց է ապատեղեկատվության վրա հիմնված քարոզչական պատերազմ վարում: Բայց այն, որ այնպիսի լուրջ վերլուծական կենտրոնը, ինչպիսին Stratfor-ն է, ոչ հավաստի տվյալներ է օգտագործում, անթույլատրելի է»,- նշեց ռազմական փորձագետը:
Արկադի Գրիգորյանն ընդգծեց, որ կենտրոնի վերլուծաբանները պարտավոր էին ստուգել տեղեկության հավաստիությունը:
«Ինչպես արդեն ասվեց, այդ բարձունքը 1994 թվականից գտնվում է Ադրբեջանի վերահսկողության ներքո: Համապատասխանաբար, խոսք չի կարող լինել «վերահսկողության վերահաստատման» մասին: Հասկանալի է, որ Ադրբեջանը, չկարողանալով հաջողության հասնել գործնականում, փորձում է խոսքով՝ ապատեղեկատվության օգնությամբ իրեն հաղթողի «փառք» վերագրել: Բայց երբ ինքնախաբեությունը վերածվում է «տեղեկության աղբյուրի» հեղինակավոր վերլուծական կենտրոնի համար, պարզապես ափսոսանք է առաջացնում»,- ամփոփեց Արկադի Գրիգորյանը:
