Բալեարյան կղզիների դատարանում վերսկսվել է կոռուպցիայի վերաբերյալ դատական գործը, որում մեղադրյալներից մեկը Իսպանիայի թագավորի քույրն է` արքայադուստր Քրիստինան: Ուղղակի ապացույց չկա առ այն, որ նա էլ է մասնակցել այն ֆինանսական մեքենայություններին, որի համար մեղադրվում է նրա ամուսինը` Ինյակի Ուրդանգարինը: Այնուամենայնիվ, «Մաքուր ձեռքեր» միավորումը, որը հանդես է գալիս որպես հասարակական մեղադրող, պահանջում է արքայադստերը 8 տարվա ազատազրկման դատապարտել:
«Սա շատ կարեւոր օր է եւ իսպանական արդարադատության, եւ ժողովրդի համար, որովհետեւ այս քաղաքացուհին այսօր դատարանի դահլիճում է իրեն հասցեագրվող մեղադրանքների համար», – ասում է մեղադրող կողմի ներկայացուցիչ Վիրխինիա Լոպես Նեգրետեն, տեղեկացնում է Euronews-ը:
Արքայադուստրից ու նրա ամուսնուց բացի, այդ գործով 15 մարդ է անցնում: Նրանք բոլորը մեղադրվում են ավելի քան 6 մլն եվրո յուրացնելու համար: Քննության վարկածով, արքայադստեր ամուսնու ղեկավարած «Նոոս ինստիտուտ» հասարակական կազմակերպությունը Բալեարյան կղզիների եւ Վալենսիայի բյուջեներից անօրինականորեն խոշոր գումարներ է ստացել մարզական միջոցառումներ անցկացնելու համար, այդ գումարները հետագայում յուրացվել են մեղադրյալների կողմից: