Ասիայի եւ խաղաղօվկիանոսյան տարածաշրջանը կանգնած է լուրջ մարտահրավերների առջեւ, ինչը էապես խոչընդոտում է տնտեսական զարգացմանը։ Այդ մասին ասել է ՀՀ նախագահ Սերժ Սարգսյանը, որն այսօր ընդունել է ՄԱԿ-ի գլխավոր քարտուղարի տեղակալ, Ասիայի եւ խաղաղօվկիանոսյան տարածաշրջանի տնտեսական եւ սոցիալական հանձնաժողովի գործադիր քարտուղար Շամշար Ախթարին:
Զրուցակիցները քննարկել են Հայաստանի եւ ՄԱԿ-ի Ասիայի եւ խաղաղօվկիանոսյան տարածաշրջանի տնտեսական եւ սոցիալական հանձնաժողովի միջեւ համագործակցությանը վերաբերող հարցեր: Հանրապետության նախագահը կարեւորել է վերոնշյալ հանձնաժողովի գործունեությունը եւ մեր երկրի անունից պատրաստակամություն հայտնել զարգացնել այդ կառույցի հետ փոխգործակցությունը:
Նշելով, որ այսօր Ասիայի եւ խաղաղօվկիանոսյան տարածաշրջանը կանգնած է լուրջ մարտահրավերների առջեւ, ինչը էապես խոչընդոտում է տնտեսական զարգացմանը, Սերժ Սարգսյանը կարեւորել է միջազգային հանրության կողմից ակտիվ ջանքերի գործադրումը՝ ձեւավորելու համընդգրկուն օրակարգ, մշակելու համապատասխան ծրագիր, որն ունակ կլինի արձագանքելու եւ դիմակայելու այդ մարտահրավերներին: ՀՀ նախագահը վստահեցրել է, որ Հայաստանը պատրաստ է իր համեստ մասնակցությունն ունենալու այդ գործում եւ մեծապես կարեւորել է հանձնաժողովի հետ փոխգործակցությունը՝ որպես քննարկումների լավ հարթակ:
Շամշար Ախթարը, համակարծիք լինելով տարածաշրջանի իրավիճակին ՀՀ նախագահի տված գնահատականի հետ, ընդգծել է, որ լավատեսորեն է տրամադրված ապագայի նկատմամբ եւ շնորհակալ է Հայաստանի համագործակցության պատրաստակամության համար:
Նա ներկայացրել է տարածաշրջանում կայուն աճ ապահովելու, այդ նպատակով անհրաժեշտ խթանիչ միջոցառումներ ձեռնարկելու ուղղությամբ Հանձնաժողովի առաջիկա ծրագրերը՝ կարեւորելով տարածաշրջանի երկրների տնտեսական տեսլականը եւ քաղաքական հանձնառությունները:
Հանդիպմանը երկուստեք կարեւորվել է տարածաշրջանային ինտեգրացիոն գործընթացների եւ համագործակցության զարգացումը:
Անդրադարձ է եղել նաեւ դեպի ծով ելք չունեցող երկրներին վերաբերող հարցերին եւ այդ համատեքստում՝ ՄԱԿ-ի Ասիայի եւ խաղաղօվկիանոսյան տարածաշրջանի տնտեսական եւ սոցիալական հանձնաժողովի կողմից իրականացվող ծրագրերին: