Հայ հեղափոխական դաշնակցությունն ու Հանրապետական կուսակցությունը ընդհանուր, նախնական համաձայնության են եկել կոալիցիա կազմելու մասին։ Այդ մասին փետրվարի 10-ին ՀՀԿ ԳՄ նիստից հետո լրագրողներին ասել է ԱԺ փոխնախագահ, ՀՀԿ մամուլի քարտուղար Էդուարդ Շարմազանովը։
Նրա խոսքով, ԳՄ նիստում քննարկվել են ներկուսակցական, ներքաղաքական խնդիրները, անդրադարձ է եղել ՀՅԴ հետ համագործակցության ձեւաչափին։
«ՀՀԿ-ն ՀՅԴ-ի հետ ունի նախնական համաձայնություն՝ ապագայում կառավարության կազմում աշխատելու ուղղությամբ։ Վերջնական համաձայնության մասին կտեղեկանաք մինչեւ շաբաթվա վերջ։ ՀՅԴ-ի հետ Հանրապետական կուսակցությունը շատ հավանական է համարում համաձայնագիրը»,- ասել է Շարմազանովը։
Հարցին, թե որ նախարարական պորտֆելներն ու մարզերն են տրվելու ՀՅԴ-ին, Շարմազանովը չպատասխանեց. «Ես իրավունք չունեմ հրապարակային, որպես կուսակցության խոսնակ նեկայացնել, թե որ պաշտոններն են տրվելու։ Այս փուլում կարող եմ ասել, որ ՀՅԴ-ն եւ ՀՀԿ-ն ունեն ընդհանուր համաձայնության ապագայում Հ քաղաքական օրակարգում միասնաբար հանդես գալու»,- նշեց նա։ Շարմազանովը նաեւ չպատասխանեց իր կուսակից, ԿԳ նախարար Արմեն Աշոտյանի պաշտոնանկության մասին հարցին՝ խորհուրդ տալով սպասել երեք օր։
«Երեք օր հետո կասեմ։ Մեր կուսակցական գործընկերները բոլորը կշարունակեն իրենց գործունեությունը, մեկը մի ոլորտում, մյուսը՝ կուսակցական ոլորտում»։ ԱԺ փոխնախագահը համենայն դեպս ասաց, որ պաշտոնների հարցում էլ ՀՅԴ-ն ու ՀՀԿ-ն եկել են ընդհանուր հայտարարի, սակայն առայմ հստակ թիվը չի նշի։