Պենտագոնը կրկին պնդում է, որ Ռուսաստանի օդատիեզերական ուժերը (ՕՏՈՒ) Սիրիայում ավիահարվածներ են հասցնում խաղաղ բնակիչների ուղղությամբ: Այս մասին հայտարարել է Իրաքում եւ Սիրիայում հակաահաբեկչական արշավին մասնակցող ԱՄՆ զինված ուժերի պաշտոնական ներկայացուցիչ, գնդապետ Սթիվ Ուորենը: ՏԱՍՍ-ի փոխանցմամբ, Բաղդադից կազմակերպված հեռուստակամուրջի միջոցով նա ճեպազրույց է ունեցել Պենտագոնում հավաքված լրագրողների հետ:
«ԱՄՆ-ի ավիահարվածներն իրենց էությամբ բացառապես հակառակ են Ռուսաստանի իրականացրած անզգույշ զանգվածային ռմբակոծություններին»,- հավաստել է նա:
Ուորենի խոսքով, Մոսկվայի եւ Դամասկոսի ռազմական գործողությունները «դժվարացնում են սիրիացիներին մարդասիրական օգնություն հասցնելու գործընթացը»: Նա ենթադրում է, որ ռուսական ավիահարվածները «տասնյակ հազարավոր անմեղ սիրիացիների ստիպել են» լքել իրենց տները:
«Նրանց հարվածներն ընդամենը սատարում են Ասադի ռեժիմին, ոչ ավելին»,- կարծում է Ուորենը: