ՀՀ նախագահ Սերժ Սարգսյանն այսօր՝ փետրվարի 11-ին, շնորհավորական ուղերձ է հղել Իրանի Իսլամական Հանրապետության նախագահ Հասան Ռոհանիին եւ Իսլամական հեղափոխության գերագույն առաջնորդ Սեյյեդ Ալի Խամենեիին՝ Իսլամական հեղափոխության 37-րդ տարեդարձի կապակցությամբ:
Այս մասին NEWS.am-ը տեղեկանում է նախագահի մամուլի գրասենյակից:
Նշենք, որ Իրանում իսլամական հեղափոխությունը տեղի է ունեցել 1979 թվականին, Շահ Մուհհամադ Ռեզա Փահլավիի եւ Հոգեւոր առաջնորդ Այաթալլահ Խոմեյնիի միջեւ։ Սկզբում Հեղափոխությունը անցկացվում էր հակաշահական բողոքի ցույցերով, որոնք ճնշվում էին կառավարական զորքերի կողմից։
1979 թվականի հունվարից սկսած երկրիրը կաթվածահար է եղել մշտական գործադուլներով եւ ցույցերով։ Այդ ամենի արդյունքով 1979 թվականի փետրվարի 1-ին Մուհհամադ Ռեզա Փահլավին իր ընտանիքի հետ լքել է Իրանը։ Իսկ Ֆրանսիա աքսորված Այաթոլլահ Խոմեյնին վերադարձել է Իրան։
1979 թվականի ապրիլի 1-ին Իրանում անցկացվել է հանրաքվե, որով էլ Իրանը պաշտոնապես անվանվել է Իրանի Իսլամական Հանրապետություն։ 1979 թվականի դեկտեմբերի 3-ին Իրանում ընդունվել է նոր Սահմանադրություն։
