Ոչ մի քաղաքական ուժ Արագածոտնի մարզում չի կարող այնքան գործ անել, որքան արել է Հանրապետական կուսակցությունը: Այս մասին NEWS.am-ի հետ զրույցում հայտարարել է մարզպետ Սարգիս Սահակյանը` պատասխանելով ՀՅԴ-ի այն հայտարարությանը, որ կոալիցիա են կազմում՝ երկրում ստեղծված ծանր վիճակը իշխանության ներսից փոխելու նպատակով:
«Ես չգիտեմ` ով ինչ է հայտարարել, ես ուրիշի հայտարարությունները հիմք չեմ ընդունում: Հանրապետականը էստեղ էնքան գործ է արել, որ ոչ մի կուսակցություն, քաղաքական ուժ չի կարող անել: Նախագահի աջակցությամբ շատ հարցեր ենք լուծել»,-ասաց Սարգիս Սահակյանը:
Նա որպես իր լավ աշխատանքի արդյունք` վկայեց նաեւ ընտրությունների ժամանակ Հանրապետականի օգտին արձանագրված բարձր տոկոսները: «Թող գան հարցնեն մարզի բնակչությանը: Մեր հեղինակությունն էնքան մեծ ա ու ավելի հզորանալու ա: 2012 թվականին մենք 70 տոկոս ձայն ենք հավաքել ՀՀԿ-ի օգտին ու այդպես էլ շարունակվելու է: Սահմանադրական հանրաքվեի ժամանակ էլ 70 տոկոս էր: Ես քաղաքական թիմի անդամ եմ, Հանրապետական կուսակցության մարզային խորհրդի նախագահ, եթե այդպես որոշի նախագահը, ես պատրաստ եմ իրականացնել»,-ասաց նա:
Հարցին, թե ինչո՞ւ հենց իր պաշտոնն են զիջում ՀՅԴ-ին, միգուցե իրենից դժգո՞հ է Սերժ Սարգսյանը, մարզպետը պատասխանեց. «Ես քաղաքական թիմի անդամ եմ, ինչպես կորոշի երկրի նախագահը, էնպես էլ պատրաստ ենք իրագործել: Ինչի պիտի նեղանամ Սերժ Սարգսյանից»:
