2016 թ ղարաբաղյան հակամարտության հավանական սրման մասին ամերիկյան հետախուզության զեկույցը չի նշանակում, որ ռազմական գործողությունները հաստատ կվերսկսվեն: Այդ մասին NEWS.am –ի թղթակցի հետ զրույցում հայտնել է Կովկասի ինստիտուտի փոխտնօրեն քաղաքագետ Սերգեյ Մինասյանը:
Նրա խոսքով, ԱՄՆ ազգային հետախուզության տնօրենի զեկույցը ձեւական, բյուրոկրատական փաստաթուղթ է, որը որոշակի պարբերականությամբ ՝ տարեկան մեկ անգամ, պատրաստում է ամերիկյան հետախուզությունը: «Ոչ մի անբնական բան այդ փաստաթղթում չկա: Այն մասում, որը ղարաբաղյան հակամարտությանն է վերաբերում, նշվում է, որ կա սրման վտանգ: Ամերիկյան հետաախուզության աշխատանքը ներառում է բոլոր պոտենցիալ սպառնալիքների, հակամարտությունների վերհանումը՝ առաջին հերթին Միացյալ նահանգների ազգային շահերի տեսակետից: Համապատասխանաբար, սա ձեւական փաստաթուղթ է, որը ենթադրում է նմանատիպ սպառնալիքի հավանականությունը, բայց ոչ ավելին»,- նշեց Մինասյանը:
Հիշեցնենք, որ օրերս ԱՄՆ ազգային հետախուզության տնօրեն Ջեյմս Քլեփերի ներկայացրած զեկույցում նշված էր, որ ԱՄն հետախուզությունը չի բացառում, որ 2016 թ. ղարաբաղյան հակամարտության գոտում սրում կլինի: