Հայաստանը «կանաչ» տնտեսության ռազմավարություն կմշակի: Այս մասին, փետրվարի 10-11-ին Բրյուսելում ընթացող ԵՄ արեւելյան գործընկերության երկրների՝ «Դեպի «Կանաչ տնտեսության» ներդրում» /EaP GREEN/ 5-րդ նստաշրջանի ժամանակ իր ելույթում նշել է ՀՀ բնապահպանության նախարարի տեղակալ Խաչիկ Հակոբյանը:
«Կանաչ տնտեսության ներդրման» քաղաքականությունն ուղղված է ԵՄ Արեւելյան գործընկերության 6 երկրների աջակցությանը՝ տնտեսության զարգացման «կանաչ» մոդելին անցման հարցում՝ հաղթահարելու տնտեսական աճի ուղղակի կախվածությունը շրջակա միջավայրի դեգրադացումից եւ բնական ռեսուրսների վատնումից:
Արեւելյան գործընկերության երկրների հաշվետվությունների շրջանակում փոխնախարար Հակոբյանն իր ելույթում մասնավորապես նշել է. «Կանաչ տնտեսության ներդրման» քաղաքականությանն ուղղված գործողությունների շրջանակներում դեռեւս 2015 թ. ապրիլին Երեւանում տեղի է ունեցել «Ռեսուրսների արդյունավետություն եւ մաքուր արտադրություն» (ՌԱՄԱ) ծրագրի համակարգող խորհրդի նիստ, որը քննարկել է ծրագրի գործունեությունն ու արդյունքները, ինչպես նաեւ խրախուսել ՌԱՄԱ կենտրոնի ստեղծման գաղափարը: ՌԱՄԱ կենտրոնը կկազմակերպի խորհրդատվական ծառայությունների մատուցում, ինչպես նաեւ կմշակի ռեսուրսների արդյունավետության եւ մաքուր արտադրության նոր տեխնոլոգիաներ եւ «կանաչ» տնտեսության ռազմավարություն»:
