Հայաստանը ինքնիշխան պետություն է ու միջազգային կազմակերպությունների խորհուրդները ընդունում է որպես հավասար կողմ: Այս մասին փետրվարի 11-ին Կառավարության նիստից հետո լրագրողներին հայտնել է ՀՀ ԱԺ աշխատակազմի ղեկավար, սահմանադրական բարեփոխումների փաթեթի համահեղինակ Հրայր Թովմասյանը՝ մեկնաբանելով ԵԱՀԿ/ԺՄԻԳ մոնիտորինգային հանձնաժողովի զեկույցը՝ 2015թ. դեկտեմբերի 6-ին անցկացված սահմանադրական հանրաքվեի վերաբերյալ:
«Հայաստանը հարգանքով է վերաբերում միջազգային կազմակերպություններին ու լսում է նրանց կարծիքը: Մենք երբեք միայն այդ կազմակերպությունների համակրանքը շահելու համար բարեփոխումներ չենք նախաձեռնում: Բարեփոխումները մեզ են պետք»,- ասել է Թովմասյանը: Նրա խոսքով, հաշվի առնելով նախորդ ընտրական գործընթացները՝ ԵԱՀԿ/ԺՄԻԳ առաջարկները կքննարկվեն նոր Ընտրական օրենսգրքի ընդունման ժամանակ ու դրանք մեծ մասը լուծում կստանա:
Նշենք, որ ԵԱՀԿ/ԺՄԻԳ-ը հանրաքվեի ընթացքում տեղ գտած մի շարք լուրջ թերություններ էր նշել, այդ թվում ուռճացած ընտրացուցակները:
