Ցանկալի է, որ նոր Ընտրական օրենսգրքի նախագծի քննարկմանը մասնակցեն բոլոր քաղաքական ուժերը։ Այս մասին փետրվարի 11-ին կայացած Կառավարության նիստից հետո լրագրողներին ասել է ՀՀ խորհրդարանի աշխատակազմի ղեկավար Հրայր Թովմասյանը։
Նրա խոսքով՝ այդ դեպքում նոր օրենսգիրքը ավելի մեծ վստահության կարժանանա հասարակության շրջանում։ Թովմասյանը հիշեցրել է, որ սահմանադրական փոփոխությունների համաձայն՝ նոր Ընտրական օրենսգիրքը պետք է ուժի մեջ մտնի մինչեւ հունիսի 1-ը։ «Հիմա ոչինչ չեմ ասի, ուղղակի կոչ եմ անում բոյկոտի փոխարեն մասնակցել քննարկումներին։ Եթե ամենասկզբից ինչ-որ ուժ որոշի չմասնակցել, դա կարող է առնվազն չնպաստել վստահության բարձրացմանը, իսկ դա շատ կարեւոր է։ Ուզում եմ նշել, որ ընտրական համակարգը այնքանով է լավը կամ վատը, որքանով նրան վստահում է հասարակությունը։ Տեխնիկական մանրամասներն այդքան կարեւոր չեն, որքան վստահությունը»,- ասել է Հրայր Թովմասյանը։