Ստամբուլում տարեց հայ ամուսինների տան դեմ ավազակային հարձակման հետ կապված թուրքական մամուլը նոր մանրամասներ են հրապարակել։
Թուրքական Sabah-ի փոխանցմամբ՝ Շիշլիում ապրող 85-ամյա Հակոբ Դեմիրջիի եւ Սեթա Այլա Դեմիրջիի տանը որպես հավաքարար աշխատող հայաստանցի կինը զանգահարել է Հայաստանում գտնվող իր բարեկամներին՝ հայտնելով, որ հիշյալ տանը մեծ քանակությամբ զարդեր ու գումար կան։ Հենց հավաքարարն էլ կազմակերպել է ավազակային հարձակում իրականացնողների մուտքը տարեց հայ ամուսինների բնակարան։
Նշվում է, որ տնից գողացել են 1 մլն լիրայի (350 հազար ԱՄՆ դոլար) արժողությամբ զարդեր, 10 հազար ԱՄՆ դոլար եւ Հակոբ Դեմիրջիի ձեռքի ժամացույցը։
Թուրքական Milliyet-ը գրել է, թե ավազակային հարձակման մեջ կասկածվող հայաստանցիները տարբեր ժամանակահատվածներում են Թուրքիա մտել։ Կասկածյալներից ոմանք փետրվարի 5-ին են մտել Թուրքիա։ Ավազակային հարձակումից հետո Տրապիզոն մեկնած կասկածյալները ցանկացել են Վրաստանի միջոցով Հայաստան հասնել։
Նշվում է, որ արդեն ձերբակալվածները դատարան են տեղափոխվել։
Milliyet պարբերականն էլ նշել է ձերբակալված կասկածյալների անունները՝ Արթուր Ա., Արամ Է., Սերգեյ Է., Մարիանա Բ., Լիդա Է., Նարգիզ Բ., Արմինե Մ., Քրիստինա Մ.։
Հայաստանի ԱԳՆ-ն հաստատել է, որ ձերբակալվածների մեջ Հայաստանի քաղաքացիներ կան։
Հիշեցնենք, որ փետրվարի 6-ին անհայտ անձիք մտել էին Շիշլիում ապրող տարեց հայ ամուսինների տուն, վերցրել թանկարժեք զարդեր ու խոշոր չափի գումար եւ մահացու «խոզի կապանքով» կապել տանտերերին ու հեռացել։ Մինչ իրավապահների դեպքի վայր հասնելը 85-ամյա ամուսինը խեղդվել էր, իսկ կնոջը մի կերպ են փրկել։