2015թ. դեկտեմբերի 21-ին ԱԱԾ կողմից վնասազերծված զինված խմբի գործով մեղադրյալ, ՀՀ պաշտպանության նախարարի նախկին տեղակալ Վահան Շիրխանյանի կալանավորման ժամկետը երկարացնելու վերաբերյալ նախաքննական մարմինը միջնորդություն է ներկայացրել դատարան: Այս մասին NEWS.am-ի հետ զրույցում ասաց Շիրխանյանի պաշտպան Ստեփան Ոսկանյանը՝ հավելելով, որ այսօր՝ փետրվարի 11-ին, նշանակված դատական նիստը հետաձգվել է:
Պաշտպանի խոսքով՝ ինքը միջնորդել է հետաձգել նիստը՝ կալանավորման ժամկետը երկարացնելու միջնորդությունում ներկայացված ապացույցներին ծանոթանալու եւ դրանց հակադարձ ապացույցներ ներկայացնելու նպատակով:
Բացի այդ, Վահան Շիրխանյանը վատ առողջական վիճակի պատճառով չի կարողացել ներկայանալ դատարան՝ առանց իր մասնակցությամբ նիստը անցկացնելու վերաբերյալ նախապես դիմում ուղարկելով:
Նշենք, որ Վերաքննիչ դատարանը մերժել է 2015թ. դեկտեմբերի 21-ին ԱԱԾ կողմից վնասազերծված զինված խմբի գործով կալանավորված ՀՀ պաշտպանության նախարարի նախկին տեղակալ Վահան Շիրխանյանի պաշտպանների միջնորդությունը` Շիրխանյանին մասնագիտացված բուժհաստատություն տեղափոխելու վերաբերյալ:
Հիշեցնենք, որ 2015թ. նոյեմբերի 25-ին Ազգային անվտանգության ծառայությունը Երեւանում վնասազերծել է ծանր հանցագործություն կազմակերպելու մեջ կասկածվող խմբի: ԱԱԾ-ի փոխանցմամբ, նոյեմբերի 25–ին ԱԱԾ աշխատակիցները ոստիկանության հետ համատեղ տան խուզարկության ընթացքում հայտնաբերվել են տարբեր տեսակի ինքնաձիգեր, ատրճանակներ, նռնականետեր (այդ թվում «մուխա» տեսակի), նռնակներ, պայթուցիկ նյութեր եւ պայթուցիկ սարքեր, կապի միջոցներ, փամփուշտներ, փամփշտակալներ, ռազմական հանդերձանք՝ այդ թվում զրահաբաճկոններ: Խուզարկության պահին առանձնատանը, Արթուր Վարդանյանի գլխավորությամբ, հավաքված են եղել հանցավոր խմբակցության 9 անդամները, որոնք ձերբակալվել են, ապա կալանավորվել:
ՀՀ ԱԱԾ քննչական վարչությունում հարուցվել է քրեական գործ ՀՀ քրեական օրենսգրքի 223-րդ հոդվածի 1-ի եւ 2-րդ մասերով եւ 235–րդ հոդվածի 3-րդ մասով, այն է՝ Հանցավոր համագործակցություն ստեղծելը եւ դրան մասնակցել եւ Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը:
