Հայաստանում արտաքին սոցիալական գովազդը կազատեն համայնքային հարկերից։ «Գովազդի մասին» եւ «Տեղական տուրքերի ու վճարումների» մասին օրենքներում համապատասխան փոփոխությունների նախագիծը հավանություն է ստացել փետրվար 11-ին կայացած Կառավարության նիստում։
Ինչպես նիստում հայտնել է մշակույթի նախարար Հասմիկ Պողոսյանը, հաշվի առնելով, որ սոցիալական գովազդը պետք է հանրային կարեւոր բովանդակության ունենա, առաջարկում են ստեղծել պետական հանձնաժողով, որը կքննարկի եւ հավանություն կտա թեմաներին։ Այդ թեմաներով պաստառները արտաքին գովազդի օպերատորները կարող են ցանկության դեպքում անտուրք տեղակայել իրենց դատարկ վահաններին։
«Հանձնաժողովի 7 անդամները կներկայացնեն քաղաքացիական սեկտորը, իսկ 4-ը՝ պետական մարմինները։ Դա կօգնի հանրային քննարկման ճանապարհով լուծել կարեւոր հարցերը»,- հավելել է նախարարը։ Հանձնաժողովը հաստատելու է պետական նշանակության թեմաները, իսկ սոցիալական գովազդի թեմաները մեկ համայնքի սահմաններում հաստատելու է դրա ղեկավարի ստեղծած հանձնաժողովը։