А. P. Moller-Maersk Group դանիական ընկերության ղեկավարը կարծում է, որ մեկ բարելի դիմաց 54 դոլար նավթի գինը շատ ցածր է նավթի բավարար քանակ արտադրելու եւ համաշխարհային պահանջարկը բավարարելու համար։ Այս մասին գրում է Bloomberg-ը՝ վկայակոչելով ընկերության գլխավոր տնօրեն Նիլս Անդերսենին։
«Նավթի համաշխարհային պահանջարկի բավարարման համար բավական չէ միայն այն, ինչ արտադրում է Սաուդյան Արաբիան։ Աշխարհին նավթ է պետք լինելու այն վայրերում, որտեղ բարձր արտադրական ծախսեր են լինելու։ Եվ այդ պատճառով մենք ակնկալում ենք, որ նավթի գինը կաճի»,- նշել է Նիլս Անդերսենը։
«Երբ նավթի գինը 110 դոլար էր, մենք հստակ ակնկալիքներ ունեինք, որ գինը նվազելու է, բայց իհարկե չէինք ենթադրում, որ դա կլինի բարելի դիմաց 30 դոլարը»,- ասել է Անդերսենը եւ հավելել, որ նավթի գինը պետք է ավելի բարձր լինի, քան 2015թ. միջին արժեքը։
Չնայած արտադրության կրճատմանը՝ Անդերսենը նշում է, որ իր կոնգլոմերատը ցանկանում է նավթային ակտիվներ գնել։ Անցյալ տարի Maersk-ը դիտարկում էր Africa Oil Corp ակտիվները գնելու տարբերակը, սակայն հարմար առաջարկ չէր ստացել, փոխանցում է RSN-ը։
А. P. Moller-Maersk Group-ը խոշորագույն տրանսազգային տրանսպորտային ընկերություններից մեկն է։ Խմբի ակտիվները գտնվում են 130 երկրներում։