Սահմանադրական բարեփոխումների իրավական ապահովմանն աջակցող մասնագիտական խորհրդակցական խորհուրդը նաեւ համակարգող դերակատարություն կարող է ունենալ: NEWS.am-ի թղթակցի հետ զրույցում նման կարծիք հայտնեց Սահմանադրական բարեփոխումների մասնագիտական հանձնաժողովի անդամ, ԵՊՀ իրավագիտության ֆակուլտետի դեկան Գագիկ Ղազինյանը, որը նույնպես ներգրավված է փետրվարի 10-ին ստեղծված խորհրդի կազմում:
«Երբ Սահմանադրական բարեփոխումների հանձնաժողովը պատրաստում էր Սահմանադրության նախագիծը, լուծումներ առաջարկելիս արդեն իսկ ուներ որոշակի գաղափարներ, որոնք պետք է կյանքի կոչվեին օրենքների եւ մնացած իրավական ակտերի միջոցով: Հետեւաբար, զերծ պահել հանձնաժողովին օրենսգրքերում փոփոխություններ կամ լրացումներ կատարելուց, կարող էր վտանգել Սահմանադրության մեջ դրված գաղափարախոսությունը, որը հիմք էր հանդիսացել Սահմանադրական կարգավորումների համար»,- ասաց Գագիկ Ղազինյանը:
Ղազինյանի խոսքով՝ ի սկզբանե ենթադրվում էր, որ իրենք պետք է ներգրավվեին այս գործընթացներում, թեեւ խորհրդակցական խորհրդի տեսքով:
«Իհարկե, ես կարծում եմ, որ այս խորհուրդը նաեւ համակարգող դերակատարություն կարող է ունենալ»,- նշեց նա:
Հիշեցնենք, որ Սերժ Սարգսյանը փետրվարի 10-ին հրամանագիր է ստորագրել նախագահին առընթեր Սահմանադրական բարեփոխումների իրավական ապահովմանն աջակցող մասնագիտական խորհրդակցական խորհուրդ ստեղծելու մասին:
Խորհուրդը քննարկելու եւ օրենսդիր մարմնի հաստատմանն է ներկայացնելու Սահմանադրական հանրաքվեից հետո փոփոխման կարիք ունեցող օրենքների ցանկը։
Խորհրդի նախագահն է Սահմանադրական դատարանի նախագահ Գագիկ Հարությունյանը, կազմում են Դավիթ Հարությունյանը, Հրայր Թովմասյանը, Գեւորգ Կոստանյանը, Գագիկ Ղազինյանը եւ այլք։