ՆԱՏՕ-ի գլխավոր քարտուղար Իենս Սթոլթենբերգը հրաժարվել է մեկնաբանել դաշինքի անդամ Թուրքիայի կոչը` Սիրիային սահմանակից տարածքում ոչ թռիչքային գոտի մտցնելու մասին: Սթոլթենբերգն այդ մասին հայտնել է ՆԱՏՕ-ի նախարարների հանդիպման ավարտին` պատասխանելով Սիրիայում ոչ թռիչքային գոտու ստեղծման հեռանկարների մասին լրագրողների հարցերին:
«Կոալիցիայի (Սիրիայում ԱՄՆ-ի ղեկավարությամբ) գործունեության հետ կապված հարցերով պետք է դիմել կոալիցիային, որին ՆԱՏՕ-ն աջակցում է, բայց չի մասնակցում», - ասել է նա, տեղեկացնում է ՏԱՍՍ-ը:
«ՆԱՏՕ-ի բոլոր երկրներն իրենց ներդրումն են բերում ԻԼԻՊ-ի դեմ պայքարի միջազգային կոալիցիային, բայց ՆԱՏՕ-ն ընդամենը աջակցում է այդ կոալիցիային: Այսօր մենք որոշում ենք կայացրել ԱՎԱԿՍ ռադար-ինքնաթիռներ (ավիացիայի հեռավոր ռադիոլոկացիոն հայտնաբերման եւ կառավարման համակարգի ինքնաթիռներ. ծ. ՏԱՍՍ-ի) ուղարկելու եւ Սիրիայի եւ Թուրքիայի տարածքի դիտարկման եւ մոնիտորինգի խստացման վերաբերյալ: ՆԱՏՕ-ն պատասխանատու է հարավից եւ թուրք-սիրիական սահմանին մարտահրավերների համար», -ասել է նա: