Չեխական Doosan Skoda Power ընկերությունը Հայկակական ԱԷԿ-ի հետ բանակցություններ է վարում տուրբինների վերանորոգման շուրջ: Այդ մասին NEWS.am-ի թղթակցին հայտնել է ընկերության վերանորոգման եւ արդիականացման վարչության ղեկավար Ադամ Բայերը:
Ընկերությունը էլեկտրակայանների մեքենայական սրահերի համար սարքավորումներ է արտադրում, ներառյալ շոգետուրբինային գեներատորներ, կոնդենսատորներ եւ այլ սարքավորումներ, որոնք կապված չեն ջեռուցման կաթսաների հետ:
«Մենք կարող ենք աշխատել ջերմային եւ ատոմային կայանների, ինչպես նաեւ աղբից եւ կենսազանգվածից էներգիա ստացող կայանների համար: Հայաստանում մենք հետաքրքվում ենք Մեծամորի ԱԷԿ-ի արդիականացմամբ: 1-2 ամիս առաջ հանդիպել ենք կայանի ղեկավարության հետ եւ հարցում ենք ստացել ներկայացնելու մեր տեխնոլոգիաները», - տեղեկացնում է Բայերը:
Նա ընդգծում է, որ Skoda-ն խորհրդային ՋՋԷՌ տեսակի ռեակտորների հետ աշխատանքի մեծ փորձ ունի, Մեծամորում հենց այդպիսի ռեակտոր է տեղադրված:
Չեխոսլովակիայի համար, հավելել է նա, ատոմային կայանների ամբողջ սարքավորումը ԽՍՀՄ-ում էր արտադրվում: «Այդ պատճառով մենք բավականին երկար ժամանակ ՋՋԷՌ ռեակտորների համար տուրբիններ էինք արտադրում: Այսինքն մեր փորձը հենց հարմար է Մեծամորին», - ամփոփել է նա:
Հիշեցնենք, որ 2017-ին 3-4 ամսով Հայկական ԱԷԿ-ի պլանային վերանորոգման առաջին փուլը պիտի անցկացվի (համանման երկրորդ փուլը կիրականացվի 2018-ին): Աշխատանքը համակարգում է «Ռոսատոմ» ռուսական պետական կորպորացիան:
2015-ի մայիսին Հայաստանի խորհրդարանը վավերացրեց Ռուսաստանից 270 մլն դոլարի վարկային գծի եւ 30 մլն դոլարի դրամաշնորհի ստացումը Մեծամորի ԱԷԿ-ի ծառայության ժամկետը 2016-ից մինչեւ 2026 թ. երկարաձգելու համար: 2018-ին Հայաստանի իշխանությունները մտադիր են բավականաչափ ներդրումներ ներգրավել նոր ատոմակայանի կառուցման համար:
