Ձեռնարկությունների ինկուբատոր հիմնադրամը (EIF) ցանկանում է շարունակել դրամաշնորհային ծրագրերը Հայաստանի բարձր տեխնոլոգիական նախագծերի համար: Այս մասին NEWS.am-ի հետ զրույցում հայտնեց EIF-ի տնօրեն Բագրատ Ենգիբարյանը:
Ներկայում IT եւ hi-tech սթարթափերի համար դրամաշնորհներ են տրամադրվում Համաշխարհային բանկի E-Society and Innovation for Competitiveness ծրագրի շրջանակում: 2016 թվականի հունիսին այն կավարտվի:
Դրամաշնորհը տրամադրվում է համաֆինանսավորման տեսքով՝ մշակողների ներդրմանը հավասար (matching grant), մինչեւ 50 հազար դոլարի չափով: Մեկ տարվա ընթացքում աջակցություն է ստացել 34 սկսնակ ընկերություն:
«Նախատեսում ենք ծրագիրը շարունակել Եվրամիության աջակցությամբ: Պայմանները նույնն են լինելու, պարզապես չգիտենք, թե քանի շահառու կարող ենք ունենալ այս տարի»,- պարզաբանեց Ենգիբարյանը: