Իրանի դեմ սահմանված պատժամիջոցների վերացումից հետո այդ երկրում ինտերնետ-թրաֆիկի օգտագործումն ու տարանցումը կարող է ավելանալ: Այս մասին NEWS.am-ի թղթակցի հետ զրույցում հայտարարեց հեռահաղորդակցության ոլորտի GNC Alfa (ռուսական «Ռոստելեկոմ»-ի դուստր ձեռնարկություն) ընկերության գլխավոր տնօրեն Հայկ Ֆարամազյանը:
Ընկերության ցանցը սահմանային երեք կետ ունի Վրաստանի հետ, եւս մեկը՝ Իրանի, որոնց միջոցով տվյալների տարանցում է կատարվում:
Իրանի դեմ պատժամիջոցներն ինտերնետ-թրաֆիկին չէին վերաբերում, սակայն խանգարում էին դրա համար վճարումներին: «Բնականաբար, բիզնես վարելը դժվար էր: Իսկ հիմա ցանկանում ենք ավելացնել պատվերների քանակը: Առավել եւս, որ թողունակության խնդիր չունենք: Հույս ունենք, որ մոտ ապագայում արդյունքներ կլինեն»,- հայտարարեց Ֆարամազյանը: