Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության մեջ մեղադրվող Գնել Թեւոսյանի հայրը՝ ինստիտուտի պետի նախկին տեղակալ, կոչումով գնդապետ Զարմիկ Մարկոսյանը հավատում է, որ որդին սպանությանը չի մասնակցել:
«Ինձ ասել ա՝ պապ, ճակատդ բաց ման արի ժողովրդի մեջ, ես էդ գործում չկամ»,- NEWS.am-ի հետ զրույցում ասաց Զարմիկ Մարկոսյանը:
Զարմիկ Մարկոսյանը դատաքննության վերաբերյալ այս փուլում չցանկացավ կարծիք հայտնել. «Եթե ինքը մեղավոր լինի, ես ինքս կուզեմ, որ պատժվի»:
Նշենք, որ Հայկազ Բարսեղյանի սպանության համար մեղադրվում են նրա համակուրսեցիները` կուրսանտներ Գնել Թեւոսյանը, Նորիկ Սահակյանը, Վաչե Սահակյանը եւ Մովսես Ազարյանը։ Ըստ մեղադրանքի՝ նրանք հունվարի 29-ին՝ ժամը 02:00-ից 03:00-ի սահմանում, զորամասի ննջարանում դաժանությամբ սպանել են կուրսանտ Հայկազ Բարսեղյանին, ապա հետքերը թաքցնելու նպատակով կախել նրա մարմինը մարզահրապարակում գտնվող պտտաձողից, նրա անունից գրություն թողել, թե իբր ինքնասպան է եղել: Ամբաստանյալներն իրենց մեղավոր չեն ճանաչում:
Նշենք, որ Զարմիկ Մարկոսյանին նույնպես մեղադրանք է առաջադրվել: Ըստ մեղադրանքի՝ նա որդու համար արտոնյալ պայմաններ է ստեղծել, զբաղվել է որդու հովանավորչությամբ, չարաշահելով պաշտոնեական դիրքը՝ 2014թ. օգոստոս ամսից մինչեւ 2015թ. հունվարի 28-ը ներառյալ հանձնարարել է ենթակա սպաներին, պարբերաբար, առանց համապատասխան փաստաթղթային ձեւակերպման, Գ.Թեւոսյանին մի քանի ժամ տեւողությամբ ազատել ծառայողական պարտականությունները կատարելուց եւ թույլատրել բացակայել զորամասի տարածքից: