Թուրքիան աստիճանաբար դուրս է մղվում մերձավորարեւելյան տարածաշրջանից, Ռուսաստանը սկսել է վերադառնալ «Մեծ» Մերձավոր Արեւելք: Այս մասին փետրվարի 12-ին՝ մամուլի ասուլիսի ժամանակ, հայտնել է արտակարգ ու լիազոր դեսպան Արման Նավասարդյանը։
Նրա խոսքով՝ Ռուսաստանի ամենաամեծ դիվանագիտական սխալներից մեկը Թուրքիայի հետ լավ հարաբերություններ սկսելն էր: «Սակայն հետո հարաբերությունները կտրուկ փոխվեցին: Այսօր երկու երկրների միջեւ ստեղծվել է կիսապատերազմական դրություն, ու եթե խոսենք հռոմեացի իրավաբանների լեզվով, կան casus belli-ի բոլոր բաղկացուցիչներն ու սեգմենտները»,- շեշտեց Արման Նավասարդյանը:
Անդրադառնալով 1921 թ. Մոսկվայի պայմանագրի խզմանը ու Ռուսաստանի ԱԳՆ ներկայացուցիչ Մարիա Զախարովայի համապատասխան հայտարարությանը՝ դիվանագետը նշեց. «Կարծում եմ, որ այսքանով ամեն ինչ կսահմանափակվի: Կարելի է խզել պայմանագիրը, բայց դա ընդամենը քարոզչական քայլ կլինի: Պայմանագրի խզումով տարածքային հարցեր չեն լուծվում: Տարածքային հարցերրը լուծվում են միայն պատերազմի միջոցով»:
Հիշեցնենք, որ Պետդումայի պատգամավորներ Վալերի Ռաշկինն ու Սերգեյ Օբուխովը դիմել են Ռուսաստանի նախագահ Վլադիմիր Պուտինին ու արտգործնախարար Սերգեյ Լավրովին՝ առաջարկելով խզել բարեկամության ու եղբայրության մասին Մոսկվայի պայմանագիրը, որը ստորագրվել էր 1921 թ. մարտի 16-ին Խորհրդային Ռուսաստանի կառավարության ու Թուրքիայի իշխանությունների միջեւ:
Ռուսաստանի ԱԳՆ ներկայացուցիչ Մարիա Զախարովան հայտնել է, որ Ռուսաստանի արտաքին քաղաքական գերատեսչությունն ուսումնասիրում է՝ Թուրքիայի հետ բարեկամության մասին պայմանագիրը խզելու մասին Պետդումայի պատգամավորների առաջարկը: