ՆԱՏՕ-ի գլխավոր քարտուղար Յենս Սթոլթենբերգը ղարաբաղյան հակամարտության կողմերին կոչ է անում խուսափել իրավիճակի հետագա սրումից։ Այսօր՝ փետրվարի 12-ին, Բրուսելում՝ ՆԱՏՕ-ի կենտրոնակայանում, «Ազատություն» ռադիոկայանին հետ զրույցում Սթոլթենբերգը մի քանի անգամ շեշտել է, որ Հյուսիսատլանտյան դաշինքը լարվածության թուլացման կողմնակից է։
«Ես կարծում եմ՝ ամենակարեւորն այն է, որ կողմերը կամք եւ զսպվածություն ցուցաբերեն, խուսափեն ղարաբաղյան հակամարտության գոտում իրավիճակի սրումից»,- ասաց Ստոլտենբերգը։
Օրերս Միացյալ Նահանգների Ազգային հետախուզության ծառայության տնօրեն Ջեյմս Քլափերն իր ամենամյա զեկույցում նշել էր, որ այս տարի հակամարտության գոտում իրավիճակը կարող է էլ ավելի լարվել: «Բաքվի շարունակական վերազինումը՝ զուգորդված Ադրբեջանի տնտեսական պայմանների վատթարացման հետ, 2016 թվականին մեծացնում են հակամարտության սրման հավանականությունը: Ադրբեջանի հրապարակային մերժողականությունը Լեռնային Ղարաբաղի վերաբերյալ պահանջներից հրաժարվելու հարցում եւ Հայաստանի դժկամությունը իր հսկողության տակ գտնվող տարածքները հանձնելու հարցում շարունակելու են բարդացնել խաղաղ կարգավորման հնարավորությունը»,- արձանագրել էր Քլափերը:
«Ազատության» հարցին, թե արդյոք ՆԱՏՕ-ում է՞լ են կարծում, որ իրավիճակը կարող է սրվել ղարաբաղյան գոտում, դաշինքի գլխավոր քարտուղարը հստակ պատասխան չտվեց՝ միաժամանակ ընդգծելով, որ իրենք ուշադրությամբ հետեւում են տարածաշրջանային զարգացումներին։
«Մենք, իհարկե, ուշադիր հետեւում ենք Ադրբեջանում եւ Լեռնային Ղարաբաղում զարգացումներին։ Ե՛վ Ադրբեջանը, եւ՛ Հայաստանը ՆԱՏՕ-ի գործընկերներն են, եւ մենք երկու երկրների հետ համագործակցությունը շատ բարձր ենք գնահատում»,- ասաց նա։