ՀՀ նախագահի նստավայրում այսօր՝ փետրվարի 12-ի երեկոյան երկրի բարձրաստիճան պաշտոնյաների հետ հանդիպման ժամանակ ոչ թե ՀՀԿ-ՀՅԴ համագործակցության հուշագիր է ստորագրվելու, այլ ՀՀ նախագահ Սերժ Սարգսյանը ելույթ է ունենալու Սահմանադրության փոփոխությունների կենսագործման վերաբերյալ: Այս մասին Tert.am-ին հայտնել է ՀՀ նախագահի մամուլի քարտուղար Վլադիմիր Հակոբյանը:
Ճի՞շտ են արդյոք այն լուրերը, որ այսօր Նախագահի նստավայրում նախատեսվում է ՀՀԿ եւ ՀՅԴ կուսակցությունների միջեւ համագործակցության մասին համաձայնագրի ստորագրումը:
Ոչ, այսօր նման բան չի նախատեսվում:
Այդ դեպքում ինչո՞ւ են երեկոյան նախագահական նստավայր հրավիրվել երկրի բարձրաստիճան պաշտոնյաները:
Հանդիպում իսկապես լինելու է, որի ընթացքում ՀՀ նախագահ Սերժ Սարգսյանը նախագահի նստավայրում հյուրընկալելու է օրենսդիր, գործադիր եւ դատական իշխանությունների, տարածքային կառավարման եւ տեղական ինքնակառավարման մարմինների ղեկավար կազմի ներկայացուցիչներին: ՀՀ Նախագահը հանդես է գալու ելույթով, սակայն այն ոչ թե ՀՅԴ-ի հետ համագործակցության մասին է, այլ Սահմանադրության փոփոխությունների կենսագործման վերաբերյալ է:
Ավելի վաղ ՀՀԿ խմբակցության ղեկավար Վահրամ Բաղդասարյանը NEWS.am-ի հետ զրույցում նշել էր, որ ՀՀԿ- ՀՅԴ համագործակցության մասին հայտարարությունը կարվի այսօր մինչեւ օրվա վերջ: «Նախատեսվում է թիմի հավաք, որից հետո Հանրապետության նախագահը հայտարարություն կանի»,- ասել էր Վահրամ Բաղդասարյանը: