2015թ. դեկտեմբերի 6-ին տեղի ունեցած սահմանադրական հանրաքվեի ընթացքում եղած ընտրախախտումներն որքան շատ չեն եղել, ինչքան աղմուկ բարձրացվեց: Այս մասին այսօր` փետրվարի 12-ին, լրագրողների հետ հանդիպմանն ասաց ԱԺ ՀՀԿ խմբակցության անդամ Մկրտիչ Մինասյանը:
«Վերջին սահմանադրական ընտրությունների ժամանակ ինչքան աղմուկ որ բարձրացվեց, այդքան խախտում չի եղել, ես եղել եմ շտաբի անդամ եւ տեղյակ եմ իրավիճակից: Այդ խախտումները չէին կարող ազդել արդյունքների վրա: Համոզված եմ, որ ամեն մի ընտրությունից հետո որոշակի փոփոխություն իրականացնելուց հետո ավելի շատ փորձ ենք ձեռք բերում եւ մի քայլ առաջ ենք անում»,-ասաց նա:
Մկրտիչ Մինասյանի խոսքով, Հայաստանում պետք է ընդհանուր ընտրական մշակույթ ձեւավորել, որպեսզի ամեն մի ընտրությունից հետո ընտրախախտումների վերաբերյալ աղմուկ չբարձրանա:
«Ասում ենք Ընտրական օրենսգիրքը փոխենք, որպեսզի քննադատություններ չլինեն: Բայց առաջնահերթ պետք է բոլորիս համար քաղաքական մշակույթ ձեւավորվի, որպեսզի ամեն մի ընտրությունից հետո աղմուկ չբարձրանա, որպեսզի մեր ազգը ընտրության չգնալով իշխանություններից չպահանջի ավելին»,-ասաց նա:
Հիշեցնենք, որ դեկտեմբերի 6-ին Հայաստանում կայացել է սահմանադրական հանրաքվե: Պաշտոնական տեղեկություններով սահմանադրական փոփոխություններին կողմ է արտահայտվել քվեարկողների 63 տոկոսը:
