ՀԱՊԿ-ը Սիրիայի հետ որեւէ կապ չունի։ Այս մասին փետրվարի 12-ին՝ հեռուստակամուրջի ժամանակ, հայտնել է կազմակերպության գլխավոր քարտուղար Նիկոլայ Բորդյուժան։
Անդրադառնալով նրան, որ թուրքերը ռմբակոծում են Սիրիայի հայաբնակ Քեսաբ քաղաքը եւ այն հարցին, թե ինչպիսին կլինի ՀԱՊԿ դիրքորոշումը, եթե Սիրիան Սաուդյան Արաբիայի կողմից ցամաքային գործողություններ իրականացնելու դեպքում դիմի այդ կառույցին պաշտպանության խնդրանքով, Նիկոլայ Բորդյուժան պատասխանեց. «Ես կասեի, որ իրատեսական չէ խոսել այն մասին, որ մեր երկրների ղեկավարները որեւէ ցամաքային գործողության կամ զորքերը մեր պետությունների սահմաններից դուրս ուղարկելու մասին որոշում կկայացնեն։ ՀԱՊԿ-ը տարածաշրջանային կառույց է։ Մենք ՆԱՏՕ-ի նման չենք ասում, օրինակ, թե կցանկանայինք ազդել աշխարհի ցանկացած կետում տեղի ունեցող իրադարձությունների վրա։ Մենք խոսում ենք մեր երկրների անվտանգության մասին եւ ՀԱՊԿ մանդատը տարածվում է միայն անդամ երկրների տարածքում անվտանգության ապահովման եւ հավաքական ուժերի օգտագործման վրա»։