Երեւանի «Մալաթիա» տոնավաճառի մոտ սեպտեմբերին դանակի 30 հարվածով սպանված կնոջ գործով դատական երկրորդ նիստը այսօր՝ փետրվարի 12-ին, կրկին հետաձգվեց դատախազի չներկայանալու պատճառով:
Դատախազի բացակայությունը վրդովվեցրեց տուժող կողմին ու վկաներին:
«Ամեն անգամ էսքան մարդու գործից կտրում, բերում են, հետաձգում են»,- վրդովվեց վկաներից մեկը:
Սպանվածի քույրը՝ Քրիստինե Դարբազյանը բարկացած ասաց, որ իր համար ծանր է ամեն անգամ գալ դատարան, տեսնել քրոջը սպանողին՝ խնդրելով դատարանին ապահովել դատախազի ներկայությունը:
«Իմ համար ամեն անգամ ծանր է անընդհատ տեսնել էս տականքի դեմքը: Ինձ համար ահավոր ծանր է դեմ դիմաց դուրս գալ մեկի հետ, ով ոչ թե մեկ, այլ դանակի 30 հարված է հասցրել քրոջս»,- ասաց նա:
Նշենք, որ դատախազը, ինչպես նախորդ անգամ, ծանուցվել էր նիստի մասին: Չներկայանալու պատճառը՝ ըստ դատարանի այն է, որ նա անցել է մեկ այլ աշխատանքի, իսկ գործն այլ դատախազի դեռ չի մակագրվել:
Տուժողի իրավահաջորդի ներկայացուցիչ, փաստաբան Սեդա Սաֆարյանը NEWS.am-ի հետ զրույցում նշեց, որ իր կարծիքով, սա դատախազի կողմից անտարբեր վերաբերմունք է գործին, անպատժելիության հետեւանք:
Հիշեցնենք, որ 2015թ. սեպտեմբերի 27-ին` ժամը 15.00-ին սահմանում «Մալաթիա» տոնավաճառի մոտ դանակահարություն էր http://news.am/arm/news/288074.html տեղի ունեցել: 38-ամյա Հեղինե Դարբազյանը մահացել էր ստացած` դանակի 30-ից ավելի հարվածներից: Սպանությունը գործելու մեղադրանով կալանավորվել է կնոջ նախկին ամուսինը` 40-ամյա Արտակ Առաքելյանը, որը խոստովանել է, որ կնոջը սպանել է խանդի հողի վրա:
Արտակ Առաքելյանին մեղադրանք է առաջադրվել ՔՕ 104-րդ հոդվածի 1-ին մասով (սպանություն), 235-րդ հոդվածի 4-րդ մասով (ապօրինի կերպով զենք կրել): Նրան մինչեւ 20 տարի ազատազրկում է սպառնում: Գործի դատաքննությունն արդեն սկսել է:
