Երեւան-Պրահա չվերթն ունի մեծ պահանջարկ, եւ արդեն մայիսից շաբաթական կիրականացնի 2-3 թռիչք: Այս մասին, այսօր՝ փետրվարի 12-ին, ՀՀ վարչապետ Հովիկ Աբրահամյանի հետ հանդիպման ժամանակ նշել է Չեխիայի առեւտրի եւ արդյունաբերության նախարար Յան Մլադեկը:
Կառավարությունից NEWS.am-ին հայտնում են, որ ՀՀ վարչապետը ողջունել է չեխական պատվիրակության այցը մեր երկիր եւ նշել, որ նման այցելությունները նպաստում են հայ-չեխական կապերի հետագա ակտիվացմանն ու ամրապնդմանը: Հովիկ Աբրահամյանը վստահություն է հայտնել, որ Երեւանում երեկ մեկնարկած հայ-չեխական գործարար համաժողովը կանցնի արդյունավետ եւ թույլ կտա բացահայտել երկկողմ հարաբերությունների զարգացման հնարավորություններն ու ուրվագծել համագործակցության նոր ոլորտներ: Վարչապետի խոսքով՝ Հայաստանը կարեւորում է Չեխիայի հետ բազմաբնույթ կապերի շարունակական զարգացումը երկուստեք հետաքրքրություն ներկայացնող տարբեր բնագավառներում:
Պարոն Մլադեկը բարձր է գնահատել երկու երկրների միջեւ փոխգործակցությունը եւ նշել, որ Երեւանում ընթացող հայ-չեխական համաժողովին մասնակցում են շուրջ 30 չեխ գործարարներ: Նախարարի խոսքով՝ նրանք հետաքրքրված են հայ գործընկերների հետ ներդրումային տարբեր ծրագրերի իրականացմամբ, այդ թվում՝ էներգետիկայի բնագավառում, մասնավորապես, Հայաստանի ատոմային էլեկտրակայանի սպասարկման համար անհրաժեշտ տեխնիկական սարքավորումների մատակարարման հարցում: Այդ նպատակով արդեն իսկ քննարկումներ են անցկացվել նաեւ ՀՀ էներգետիկայի նախարարության հետ: Չեխիայի առեւտրի եւ արդյունաբերության նախարարը վստահություն է հայտնել, որ ապրիլին Պրահայում կայանալիք հայ-չեխական միջկառավարական հանձնաժողովի հերթական նիստը եւս նոր թափ կհաղորդի երկկողմ տնտեսական համագործակցության հետագա զարգացմանը:
Վարչապետ Աբրահամյանը կարեւորել է միջկառավարական հանձնաժողովի ակտիվ գործունեությունն ու գործարար ֆորումների շարունակական անցկացումը, ինչը կնպաստի Հայաստանի եւ Չեխիայի միջեւ տնտեսական կապերում առկա մեծ ներուժի իրացմանը: Առանձնակի կարեւորվել է նաեւ Երեւան-Պրահա չվերթի վերագործարկումը: Յան Մլադեկը տեղեկացրել է, որ այդ չվերթը, որն ունի մեծ պահանջարկ, արդեն 2016 թվականի մայիսից շաբաթական կիրականացնի 2-3 թռիչք:
Այնուհետեւ զրուցակիցները քննարկել են չեխական ընկերությունների՝ հայաստանյան ազատ տնտեսական գոտիներում ներգրավելու հնարավորություններին, տնտեսության տարբեր ճյուղերում, այդ թվում՝ տեղեկատվական տեխնոլոգիաների բնագավառում համագործակցության զարգացմանն ուղղված հարցեր: Վարչապետ Աբրահամյանը ողջունել է Ներդրումների խրախուսման եւ փոխադարձ պաշտպանության մասին համաձայնագրի նախագծի շուրջ բանակցությունները վերսկսելու չեխական կողմի պատրաստակամությունը: