ՀԱՊԿ-ն արձագանքում է, արձագանքել է եւ արձագանքելու է դաշնակիցների անվտանգության վիճակի վրա ազդող ցանկացած գործողությունների։ Այս մասին փետրվարի 12-ին՝ հեռուստակամուրջի ժամանակ, հայտնել է կազմակերպության գլխավոր քարտուղար Նիկոլայ Բորդյուժա՝ անդրադառնալով հարցին, թե ինչու ՀԱՊԿ-ն չի արձագանքում իրավիճակին, երբ Ադրբեջանը գնդակոծում է Հայաստանի դիրքերը։
ՀԱՊԿ գլխավոր քարտուղարը հիշեցրել է, որ վերջին անգամ Երեւանում ինքը Հայաստանի անվտանգության խորհրդին է հանձնել հայտարարությունների ցանկը, որոնք Կովկասում տիրող իրավիճակի կապակցությամբ արվել են ՀԱՊԿ անդամ երկրների ղեկավարների, արտգործնախարարների, կառույցի հիմնական մարմինների ղեկավարների մակարդակով։
«Եվ երբ մամուլի առանձին ներկայացուցիչներ ասում են, թե ՀԱՊԿ-ն չի արձագանքում, դա ինձ մոտ զարմանք է առաջ բերում։ Պետք է ծանոթանալ ՀԱՊԿ Հավաքական անվտանգության խորհրդի հայտարարություններին, նախարարների հայտարարություններին, որոնցում անդրադարձ է կատարվել Կովկասում տիրող իրավիճակին։ Մեկ ամիս առաջ ես մեկնաբանել եմ այդ իրավիճակը։ Մենք ասել ենք, որ Լեռնային Ղարաբաղում եւ հայ-ադրբեջանական սահմանին իրավիճակի լարումն անթույլատրելի է։ Կարծում եմ, որ այս տարիներին մեր արած հայտարարությունները բավական են, եւ չեմ կարծում, որ այդ իրավիճակը ինչ-որ կերպ ազդում է կազմակերպության հեղինակության կամ վարկանիշի վրա»,- եզրափակել է Բորդյուժան։