ՄԱԿ-ում անհանգստացած են փախստականների հոսքին ի պատասխան Եվրոպայի երկրների կիրառած սահմանափակումների կապակցությամբ: Այդ մասին Ժնեւում հայտնել է ՄԱԿ-ի Փախստականների հարցերով գլխավոր հանձնակատարի վարչության ներկայացուցիչ Մելիսա Ֆլեմինգը, տեղեկացնում է ՏԱՍՍ-ը:
«Դժբախտավար, 2016-ի առաջին վեց շաբթվա ընթացքում մենք Եվրոպայում ականատեսը դարձանք բազմաթիվ իրադարձությունների, որոնք թույլ են տալիս ենթադրել, որ որոշ երկրներ իրատեսական լուծում փնտրելու փոխարեն, առաջնային են համարում ներգաղթյալների եւ փախստականների առաջ փակել դռները», - ասել է նա: Որպես օրինակ, Ֆլեմինգը նշել է հունվարին Դանիայի կողմից փախստականների ընտանիքների վերամիավորման լրացուցիչ սահմանափակումները: «ՓԳՀՎ-ն անհանգստացած է խստացված սահմանափակող միջոցներից եւ արդյունավետ եւ համընդգրկուն եվրոպական պատասխան է ակնկալում», - ընդգծել է նա:
Պաշտոնական ներկայացուցիչը ուշադրություն է հրավիրել փախստականների հանդեպ բռնարարքների աճի, ինչպես նաեւ օտարատյացության եւ «վախի վրա հիմնված քարոզչության» դրսեւորումների վրա: Փախստականների տներն ու նրանց աղոթավայրերը հարձակումների, վանդալիզմի դրսեւորումների, հրդեհումների են ենթարկվում, նշել է նա: