Լավ ֆիլմերը երիտասարդությանը նոր գաղափարների եւ ձեռքբերումների են մղում: Այդ մասին փետրվարի 12-ին բրիտանական ֆիլմերի փառատոնից առաջ հայտնել է Հայաստանում Beeline-ի գլխավոր տնօրեն Անդրեյ Պյատախտինը:
Փառատոնի կազմակերպիչը British Council-ն է, փառատոնը կընթանա Միացյալ Թագավորության դեսպանատան եւ Beeline ընկերության աջակցությամբ:
Ընկերությունն արդեն 4-րդ տարին է, որ աջակցում է փառատոնին: Բրիտանական ֆիլմերը, որ մեծահասակների սիրելին են, արդեն գրավում են նաեւ երիտասարդությանը եւ Երեւանում, եւ շրջաններում:
«Մենք ուրախ ենք, որ այս տարի ընդլայնվել է այն շրջանների ցանկը, որտեղ կցուցադրվեն ֆիլմերը: Նշանակում է, ավելի մեծ քանակությամբ մարդկանց կյանքը կլցվի հետաքրքիր ինչ-որ բանով եւ դեպի լավը կփոխվի», - հայտնել է Պյատախտինը:
Փառատոնը, որը թվով արդեն 14-րդն է, կսկսվի փետրվարի 20-ին եւ կընթանա ինչպես Երեւանում, այնպես էլ շրջաններում: Երեւանում ցուցադրությունները կընթանան փետրվարի 20-26-ը` «Մոսկվա» կինոթատրոնում, իսկ մայրաքաղաքային ցուցադրություններից հետո` շրջաններում: Այս տարի բրիտանական կինոն կհասնի Ապարան, Դիլիջան եւ Ալավերդի քաղաքներ:
Փառատոնի հատուկ հյուրը կլինի Սայմոն Ուիլքինսոնը, որն աշխատում է տրանսմեդիա ոճում: Ստեղծագործական տեխնոլոգիաների «Թումո» կենտրոնում նա կներկայացնի The Cube ֆիլմը:
