Կանադայի ռազմածովային ուժերը եւս երկու պարեկային նավ են ուղարկել Կենտրոնական ու Լատինական Ամերիկայի ափերի մոտ՝ նարկոթրաֆիկի դեմ պայքարին ուղղված միջազգային «Կարիբբի» գործողությանը մասնակցելու համար: Այս մասին ասվում է Կանադայի ՊՆ հաղորդագրության մեջ, որն ուրբաթ ստացել է ՏԱՍՍ-ի ներկայացուցչությունը:
Կանադական Edmonton եւ Saskatoon նավերը դուրս են եկել Էսկիմալթ նավահանգստից: Դրանց խնդիրն է որոնել մաքսանենգներին՝ Կենտրոնական ու Լատինական Ամերիկայի խաղաղօվկիանոսյան մասում: Հունվարի վերջին այդ տարածքների ատլանտյան ջրեր են մտել կանադական Moncton եւ Summerside պարեկային նավերը: Ավելի ուշ գործողությանը կմիանան նաեւ Կանադայի ՌՕՈւ-ի ուղղաթիռները:
«Կանադայի զինված ուժերը «Կարիբբի» գործողությունը շատ հաջողված են համարում: 10 տարի շարունակ մենք եղել ենք դրա մշտական մասնակիցներից մեկը, օգնելով բարելավել տարածաշրջանային անվտանգությունն ու կանգնեցնել նարկոթրաֆիկի հոսքը Կարիբյան ջրավազանից դեպի Հյուսիսային Ամերիկա»,- ավելի վաղ հայտնել էր Կանադայի ազգային պաշտպանության նախարար Հարջիթ Սինգխ Սաջանը:
Կարիբբի վերջին գործողության ընթացքում՝ 2015 թ. հոկտեմբեր- դեկտեմբեր ամիսներին կանադական նավաստիները մաքսանենգներից ավելի քան 20 տոննա թմրանյութ են առգրավել՝ կոկաին ու մարիխուանա:
