Ակնհայտ է, որ ինչ-որ խնդիրներ կան, որ անընդհատ ձգձգվում է ՀՅԴ-ՀՀԿ կոալիցիոն իշխանություն կազմելու մասին հայտարարությունը. երեւի Դաշնակցությունը ցանկանում է ավելին, իսկ Հանրապետականն էլ չի ուզում ավելին տալ: Այս մասին, այսօր՝ փետրվարի 13-ին, NEWS.am-ի թղթակցի հետ զրույցում նշել է Միջազգային և անվտանգության հարցերի հայկական ինստիտուտի ղեկավար, քաղաքական վերլուծաբան Ստյոպա Սաֆարյանը:
Նրա խոսքով, դրա պատճառը կարող են լինել ոչ այնքան պաշտոնների շուրջ անհամաձայնությունը, քանի որ արդեն Սերժ Սարգսյանը եւ Հրանտ Մարգարյանը համաձայնության են եկել այդ հարցում, այլ ՀՅԴ-ի եւ ՀՀԿ-ի ներսում առկա խնդիրները:
«Առավելագույնը սա կարող է լինել Դաշնակցության ներսի խնդիր, որ ներսում չկարողանա որոշել, թե ովքեր են այդ պաշտոնները զբաղեցնելու: Խնդիրները կարող են լինել Դաշնակցության ներսի եւ Հանրապետականի ներսի խնդիրներ, ավելի շատ դա է երեւում, քան այն, որ ՀՅԴ-ն եւ ՀՀԿ-ն չեն կարողանում համաձայնության գալ:
Ակնհայտ է, որ Հանրապետականի ներսում էլ կա լարվածություն, որովհետեւ սա ազդում է նաեւ ՀՀԿ-ի ներսի վերադասավորումների վրա՝ փոխվում է օմբուդսմենը, ԱԱԾ տնօրենը եւ Դաշնակցությանը տեղեր են տրվում»,-ընդգծեց Սաֆարյանը:
Նշենք, որ ՀՀԿ վերջին գործադիր մամնի նիստից հետո ՀՀԿ մամուլի քարտուղար Էդուարդ Շարմազանովը հայտարարել է, որ ՀՅԴ-ի հետ համագործակցության մասին կհայտարարվի շաբաթվա վերջին, սակայն այս պահի դրությամբ նման հայտարարություն չի արվել: