Իշխանության հետ համագործակցության արդյունքում հարցերին նայում են ոչ թե նկարի, այլ քանդակի նման: Այս մասին NEWS.am-ի հետ զրույցում ասաց ԲՀԿ խմբակցության պատգամավոր Արագած Ախոյանն` անդրադառնալով ՀՅԴ-ՀՀԿ համագործակցության արդյունավետությանը:
«Երբ սկսում են նայել տարբեր աչքերով, հենց դրա մեջ է արդյունավետությունը, որոշումները կընդունեն կոլեգիալ, դա կարեւոր է»,-ասաց Ախոյանը:
Ախոյանը, որը ծագումով Արագածոտնի մարզից է, նշեց` այս մարզում, որը հանձնվելու է ՀՅԴ-ի ղեկավարմանը, բազմաթիվ խնդիրներ կան, ինչպես ամբողջ հանրապետությունում: Բայց դժվարացավ ասել` դաշնակցական մարզպետի դեպքում ինչ կարող է ակնկալել:
«Նայած` ով ինչպես է կարողանալու այդ բոլոր լծակները օգտագործել ի շահ ժողովրդի: Ես չեմ կարող ասել` ինչ կլինի, բայց նոր մարդու ֆակտորը բերելու է փոփոխություններ: Նախկինում մի քանի անգամ տեսել ենք դաշնակցական ու հանրապետական ղեկավարներին, շատ չեն տարբերվում իրարից, օրենքը երկուսն էլ չեն կարող շրջանցել, բայց դե ոճերի տարբերություն կա»,-ասաց նա:
Հիշեցմանը, որ գործող մարզպետը ընտրությունների ժամանակ 70 տոկոս ձայն է ապահովել իր կուսակցության օգտին, դա կհաջողվի՞ իր կուսակցության օգտին ապահովել նաեւ դաշնակցական մարզպետին, Ախոյանն ասաց. «Շատ իզուր են Ձեր պատկերացումները, որ մի մարզպետ կարող է այդքան ազդեցություն ունենալ ընտրությունների վրա: Դա պայմանվորված է մարզում բնակվող ու աշխատող այն ղեկավարությամբ, որը ներկայացնում է այդ կուսակցությունը»:
Նշենք, որ նախկինում պարբերաբար լուրեր էին շրջանառվում, որ Արագածոտնի մարզպետի պաշտոնին հավակնում է Արագած Ախոյանը եւ նրան էին վերագրվում ներկայիս մարզպետ Սարգիս Սահակյանի դեմ պարբերաբար մամուլում հայտնվող անանուն նամակները: