Հաղարծինում ավտոպահեստամասերի խանութից գողություն էր կատարվել, տարածն էլ քիչ չէր, բայց խանութպանն այնպես համառոորեն են թաքցրել գողությունը, որ նույնիսկ տնեցիք էլ այդ մասին չգիտեին: Հետո երբ լուրը ջրի երես էր ելել, նա իր լռությունը բացատրում էր այսպես. «Որոշակի ենթադրություններ ունեի, ուզում էի սեփական ուժերով կորուստս վերականգնել»:
Ոստիկանության Դիլիջանի բաժնի պետի տեղակալ Վահագն Մոսինյանի խոսքով, ոստիկանությունում տեղեկություններ են ստացվել, որ Հաղարծին գյուղի բնակիչ Գոռ Ղ.-ն, Գոշ գյուղի բնակիչ Հրայր Ա.-ն եւ Դիլիջան քաղաքի բնակիչ Ռուստամ Թ.-ն 2015-ի օգոստոսին թալանել են Հաղարծին գյուղում գտնվող ավտոպահեստամասերի խանութը:
Նրանք բերման են ենթարկվել ոստիկանության բաժին: Հրայր Ա.-ն անմիջապես խոստովանել է արարքը, նրա ավտոտնակից հայտնաբերվել է գողոնի մի մասը՝ պարկերի մեջ:
Նա պատմել է, որ մկրատով կամ այլ հարմարեցված գործիքով կտրել են խանութի հետնամասի մետաղյա թիթեղը, մտել ներս, ապրանքը դուրս բերել, տեղափոխել գետի դիմացի ափ, անցկացրել պարսպի վրայով: Ապա մեքենայով տեղափոխել ավտոտնակ:
Տուժողին պատճառվել է 2 մլն դրամի վնաս: