Առանց Իրանի մասնակցության անհնար է պատկերացնել Սիրիայի ճգնաժամի խաղաղ կարգավորումը: Այս մասին NEWS.am-ի հետ զրույցում ասել է Իրանի Իսլամական Հանրապետության խորհրդարանի պատգամավոր Կարեն Խանլարյանը:
Նրա խոսքով՝ Սիրիայի հարցով բանակցություններին Իրանի մասնակցությունն ամեն դեպքում դրական արդյունքներ կգրանցի: «Տարածաշրջանային հարցերի լուծումն անհնար է առանց Իրանի մասնակցության: Իրանը քաղաքականապես կայուն այն պետությունն է, որը կարող է նպաստել խաղաղության հաստատման ցանկացած գործընթացի»,- ասել է Կարեն Խանլարյանը: Նա նշել է, որ այսօրվա դրությամբ ինչպես Թուրքիայի, այնպես էլ Սաուդյան Արաբիայի քաղաքական մոտեցումները բավական սպառնալիքներ են պարունակում խաղաղության հաստատման համար: «Այսինքն՝ այս 2 խոշոր երկրները քայլեր են ձեռնարկում, որոնք սպառնում են խաղաղությանը, եւ դա պետք է ինչ-որ կերպ հավասարակշռության բերվի: Իմ կարծիքով Իրանը իր քաղաքական կայունության շնորհիվ նման հնարավորություն է ստեղծում եւ կարող է նպաստել բանակցությունների իրական նպատակին հասնելուն»,- հավելել է Կարեն Խանլարյանը:
Հիշեցնենք, որ փետրվարի 12-ին Սիրիայի հարցով միջազգային գործընթացի մասնակից երկրները համաձայնության են եկել օգտագործել իրենց ազդեցությունը անհապաղ հումանիտար օգնություն ապահովելու համար: ԱՄՆ պետքարտուղար Ջոն Քերրին նշել է, որ Սիրիայի հարցում առաջընթաց է գրանցվել հումանիտար օգնության եւ հրադադարի վերաբերյալ։ Նրա խոսքով՝ կողմերը համաձայնության են եկել մեկ շաբաթվա ընթացքում Սիրիայում հասնել հրադադարի ռեժիմի հաստատմանը։ Ահաբեկչական խմբերին դա չի վերաբերում: ՌԴ արտգործնախարար Սերգեյ Լավրովը նշել էր, որ Սիրիայում հրադադարի հաստատման հարցով Ռուսաստան-ԱՄՆ խմբի մանդատը սահմանելու է այն շրջանները, որոնք վերահսկում են ահաբեկիչները:
