Վերջին տարիներին Իրանի եւ Հայաստանի միջեւ փոխգործակցությունը բնապահպանության ոլորտում ամրապնդվել է: Այս մասին, փետրվարի 22-ին Իրանում ՀՀ դեսպան Արտաշես Թումանյանի հետ հանդիպման ժամանակ նշել է Իրանի փոխնախագահ, Իրանի շրջակա միջավայրի պահպանության կազմակերպության ղեկավար տիկին Մասումե Էբթեքարը:
ԱԳՆ-ից NEWS.am-ին հայտնում են, որ դեսպան Թումանյանը նշել է, որ Հայաստանի եւ Իրանի միջեւ առկա է շրջակա միջավայրի բնագավառում համագործակցության դրական փորձ` ինչպես երկկողմ, այնպես էլ բազմակողմ ձեւաչափով:
Փոխնախագահ Էբթեքարը գոհունակությամբ նշել է, որ վերջին տարիներին Իրանի եւ Հայաստանի միջեւ փոխգործակցությունը բնապահպանության ոլորտում ամրապնդվել է, մասնավորապես, ստորագրվել է համագործակցության վերաբերյալ փոխըմբռնման հուշագիր:
Հայ-իրանական հարաբերությունների զարգացման համատեքստում երկուստեք ընդգծվել է, որ Իրանի նկատմամբ պատժամիջոցների վերացումը նոր հեռանկարներ է բացում երկկողմ համագործակցության զարգացման ու ամրապնդման տեսանկյունից, այդ թվում` բնապահպանության ոլորտում:
Զրուցակիցները հանգամանալից քննարկելի են Արաքս գետի աղտոտվածության խնդիրը, հայ-իրանական սահմանին ազգային բարեկամության արգելոցի հիմնման, էկոտուրիզմի զարգացման, որոշ կենդանատեսակների պահպանության համար ծրագրերի մշակման հարցերը: