ՀՀ տրանսպորտի նախարարությունը ռուսաստանցի գործընկերներին առաջարկել է Վերին Լարս անցակետում առանձին միջանցք բացել Եվրասիական միության մեքենաների համար: Այս մասին NEWS.am-ի թղթակցի հետ զրույցում ասել է Հայաստանի տրանսպորտի եւ կապի փոխնախարար Արթուր Առաքելյանը:
Հարցին, թե ընդլայնվելու է արդյոք ճանապարհը, թե առանձին գիծը հատկացվելու է արդեն գործողներից, Առաքելյանը պատասխանեց, որ առաջարկը դեռ քննարկվում է: Տարբերակ ընտրելու դեպքում հաշվի են առնվելու ռելիեֆի բարդությունները:
«Ինչպես գիտեք, ռուս-վրացական սահմանի ճանապարհը սեղմված է 2 լեռների միջեւ, որտեղով գետ է հոսում: Ձմռանն այնտեղ բարդ պայմաններ են լինում, գարնանն ու աշնանը նույնպես հեշտ չէ: Սակայն մենք ուսումնասիրել ենք տեղանքը, առաջարկներ ենք արել: Այդ պատճառով ես կարծում եմ, որ որոշումները բավական արագ կկայացվեն: Թե երբ, չեմ կարող ասել, քանի որ տարածքը ռուսական է, իսկ դա նշանակում է, որ նրանք են որոշողը»,- ասել է Առաքելյանը:
Այդ նույն պատճառով հայկական կողմի համար դժվար է խոսել միջանցքի երթուղու մասին եւ այն մասին, թե որտեղից է այն ծայր առնելու՝ չեզո՞ք գծից, թե՞ արդեն ռուսական կողմից: ՌԴ տրանսպորտային մարմինները կքննարկեն հարցը եւ իրենք որոշում կկայացնեն, հավելել է փոխնախարարը:
Նշենք, որ հիմա Հայաստանից Վերին Լարսով երթեւեկությունը զգալիորեն արագացել է թուրքական ապրանքները Ռուսաստան ներկրելու արգելքի եւ վերջերս ուկրաինական բեռնատարների տեղափոխության արգելքի պատճառով: Այդուհանդերձ առանձին միջանցքը թույլ կտա ժամանակ տնտեսել երկարաժամկետ հեռանկարում: