Այն պահից, ինչ փոխվել է «Բանանց» ֆուտբոլային ակումբի ղեկավարությունը, թիմը որդեգրել է սոցիալական նախաձեռնություններին ակտիվորեն մասնակցելու եւ հասարակության հետ շփվելու ճանապարհը: Ակումբը կազմակերպում է հետաքրքիր նախաձեռնություններ, որի շնորհիվ «Բանանցի» երկրպագուները թիվը վերջին ժամանակներս ավելացել է:
Մասնավորապես, պարբերաբար իրազեկում են խաղերի մասին անցորդներին, խաղերի ընդմիջումներին տարբեր խաղարկություններ են իրականացվում երկրպագուների համար, ֆան-ակումբ է ձեւավորվում:
Բացի այդ, թիմն ակտիվորեն ներգրավված է սոցիալական տարբեր նախաձեռնություններում, «Բանանցի» ֆուտբոլիստներն ու մարզիչները այցելում են մանկատներ: «Բանանցը» համարվում է ամենից բաց թիմը Հայաստանում. ֆուտբոլիստներն ու մարզիչները հանգիստ շփվում են ֆուտբոլասերների հետ, որոնք իրենց սպասում են խաղերից հետո:
Օրերս էլ ֆուտբոլային ակումբի ակադեմիա էին այցելել Երեւանի Հայրապետ Հայրապետյանի անվան թիվ 78 դպրոցի 7-րդ դասարանցիները: Հաշվի առնելով Հայաստանում վերջին տարիների պատանիների շրջանում ֆուտբոլի հանդեպ հետաքրքրության մեծացումը, աշակերտները ցանկություն էին հայտնել հյուրընկալվել «Բանանցի» ակադեմիայում, տեսնել թե ինչպես են մարզվում ֆուտբոլիստները եւ ինչ պայմաններում են ապրում:
Կրտսեր ֆուտբոլասերներին դիմավորել են թիմի ներկայացուցիչները: Աշակերտները տեսան, թե ինչպես են մարզվում ֆուտբոլիստները ցուրտ եղանակային պայմաններում, ծանոթացան «Բանանցի» ակադեմիայի մարզադաշտերին, մասնակցեցին վարպետության դասերի:
Պարզվեց, որ պատանիների մի մասը երազում է դառնալ ֆուտբոլիստ: Նրանցից շատերը այս այցելությունից հետո անպայման զբաղվելու են ֆուտբոլով: Հետաքրքիրն այն էր, որ աղջիկ դպրոցականները իրենց ակտիվությամբ ոչնչով չէին զիջում տղաներին՝ հավասար ֆուտբոլ էին խաղում, ինքնագրեր վերցնում ֆուտբոլիստներից: Աշակերտներին ընդունեց նաեւ թիմի գլխավոր մարզիչ Տիտո Ռամալյոն, ով փոքրիկների հետ անմիջական զրույցում տեղեկացավ, թե որ թիմերին են երկրպագում եւ ինչ գիտելիքներ ունեն ֆուտբոլի մասին:
Հանդիպման ավարտին բոլոր աշակերտները նվեր գնդակներ ստացան «Բանանց» ակումբի կողմից, որոնք շատ արագ պատվեցին թիմի ֆուտբոլիստների ստորագրություններով: Ակումբը կազմակերպել էր նաեւ հյուրասիրություն երեխաների համար: Դպրոցականները հեռանալուց ասացին, որ այսուհետ հանդիսանում են «Բանանցի» երկրպագուներ եւ որ երբեք չէին մտածի, որ Հայաստանում կարող են նման հիանալի պայմաններ լինել ֆուտբոլ սիրող երեխաների համար:
Վերա Մարտիրոսյան / Vera&Football