Թուրքիան այլեւս առաջվանը չէ. այնտեղ կան մարդիկ, որոնք պատրաստ են հայերի հետ պայքարել հանուն արդարության, հանուն Հայոց ցեղասպանության հետեւանքների վերացման: Այս մասին մարտի 31-ին մամուլի ասուլիսի ժամանակ հայտնել է «Արեւմտահայերի ազգային համագումարի» հիմնադիր, ԱԺ պատգամավոր Արագած Ախոյանը:
Նա նշել է, որ նամակ է ստացել իր ընկերոջից, Դիարբեքիր նահանգի Սուրի քաղաքի նախկին քաղաքապետ Աբդուլա Դեմիրբաշից, որին Թուրքիայի ղեկավարությունը դատապարտել էր Հայաստան այցելելու համար: «Թուրքիա վերադառնալուց անմիջապես հետո Դեմիրբաշին ձերբակալել են: Նրա կնոջը երկրից արտաքսել են: Աբդուլա Դեմիրբաշին մինչեւ հիմա հետապնդում են»,- պատմել է Արագած Ախոյանը:
Դեմիրբաշը, շարունակել է նա, դասավանդում էր Ստամբուլի համալսարաններից մեկում: «Նրան ապօրինաբար հեռացրել են աշխատանքից ու զրկել դասավանդման իրավունքից, որովհետեւ նա Թուրքիայի ղեկավարությանը չէր տեղեկացրել Հայաստան կատարած այցի մասին: Մենք դատապարտում ենք Թուրքիայի բռնապետական քաղաքականությունը»,- ամփոփել է Արագած Ախոյանը:
Հիշեցնենք, որ Սուրի քաղաքի նախկին քաղաքապետ Աբդուլա Դեմիրբաշը հայերենով ու թուրքերենով մի քանի հեքիաթ է հրատարակել, այդ թվում Հովհաննես Թումանանի «ՄԻ կաթիլ մեղրը»: Նրա նախաձեռնությամբ Դիարբեքիրի զբոսաշրջային ուղեցույցը տպագրվել է նաեւ հայերենով: Սուրի քաղաքի մուտքի մոտ էլ նաեւ հայերենով է գրված «Բարի գալուստ»:
