«Ընկերասեր, աշխույժ, դաստիարակված, չեմպիոն տղա էր»: Այսպես են բնորոշում ապրիլի 14-ին հակառակորդի կողմից մահացու հրազենային վիրավորում ստացած ՊԲ զինծառայող Մանվել Գեւորգյանի մասին հարեւանները:

«Նրա նման կշռադատված, համեստ տղա չէիք գտնի ամբողջ բակում, մեծի հետ մեծ էր, փոքրի հետ` փոքր»,- NEWS.am-ի հետ զրույցում ասում է Մանվել Գեւորգյանի հարեւանուհին` Աննա Ներսեսյանը:

Մանվելը փոքրուց սպորտով էր զբաղվում, հասցրել էր հանրապետական ու միջազգային մրցույթների մասնակցել ու հաղթել:

«Նվիրված, պարտաճանաչ տղա էր: 7 տարեկանից մոտս կարատե էր պարապում. Եվրոպայի «Գրան Պրին» է շահել, Շոտլանդիայում, Իտալիայում, Վրաստանում մրցույթներում մեդալներ է շահել: Որ հաղթում էր, ու մեր դրոշը բարձրանում էր, հուզմունքից աչքերը լցնում էր... Դեռ փոքրուց գիտեր` հայրենիքն ինչ է, հայրենասիրությունն ինչ է»,- ասում է Մանվելի մարզիչը` Արմեն Մակյանը:

Մանվելը Ֆիզիկական կուլտուրայի պետական ինստիտուտի ուսանող էր, ուսման առաջին կուրսն ավարտելուց հետո 2015թ.-ի հուլիսին էր զորակոչվել բանակ, ծառայում էր Մարտունիի զորամասերից մեկում:

«Գոհ էր ծառայությունից, միայն լավն էր պատմում: Ասում էր` թող թուրքերը վախենան, մենք վախենալու բան չունենք: Ասում էր` դուք հանգիստ եղեք, ես ձեր թիկունքը պահում եմ»,- նշում է մարզիչը:

Մանվելը ծնողների հետ վերջին անգամ ապրիլի 14-ի երեկոյան էր խոսել, ասել էր` ամեն ինչ կարգին է, դիրքեր եմ բարձրանում, իջնեմ, կզանգեմ:

«Բոլորիս հետ խոսեց, տատ ու պապի, քրոջ, բարեկամների, ասաց` կզանգի, ու էլ չզանգեց... Չեմպիոն էր տղես, հիմա էլ հերոս դարձավ»,- ասում է Մանվելի հայրը: