Մատենադարանում ավարտվել են «Aurora Dialogues»-ի շրջանակում կազմակերպված քննարկումները:
Եզրափակիչ ելույթում «100 կյանք» նախաձեռնության համահիմնադիր, Նյու Յորքի Քարնեգի հիմնադրանի նախագահ Վարդան Գրեգորյանը շնորհակալություն է հայտնել մասնակիցներին՝ նշելով, որ անցյալն ինքնին անօգուտ է. «Մենք գործ ունենք ներկայի հետ: Մենք վերցնում ենք ներկան, հետո հետ գնում՝ փորձելով գտնել այժմյան խնդիրների աղբյուրը»:
«Մենք հանդիպում ենք այստեղ (Մատենադարանում - խմբ.) ոչ միայն այն պատճառով, որ սա հայերի համար սրբազան վայր է: Այստեղ 17 հազար ձեռագրեր են պահվում: Կարեւոր է հիշել, որ հայերը փրկել են ոչ միայն հայերեն ձեռագրեր, այլեւ թուրքական, ռուսական, իրանական, եզդիական: Դա գոյության վկայություն է»,- հայտարարեց Վարդան Գրեգորյանը:
Մի քանի ժամ տեւած քննարկումների մասնակիցները չորս նիստով քննարկել են Եվրոպայում փախստականների, միգրացիոն ճգնաժամի խնդիրները, կանանց դերը հակամարտությունների կարգավորման եւ լրագրողների դերը՝ անաչառ լրատվության ներկայացման հարցում:
Քննարկումներին մասնակցել են առաջատար իրավապաշտպաններ, իրավաբաններ, լրագրողներ աշխարհի տարբեր երկրներից:
«Aurora Prize» մրցանակը հիմնվել է՝ Հայոց ցեղասպանության վերապրածների անունից իրենց փրկարարներին երախտագիտություն հայտնելու համար: Ի հիշատակ այն խիզախության, որ նրանց դրսեւորել են 100 տարի առաջ, մրցանակը շնորհվելու է հանուն ուրիշների գոյության իրենց զոհաբերող ժամանակակից հերոսներին:
Մրցանակի հիմնադիրներն են հայ գործարարներ Ռուբեն Վարդանյանը, Նուբար Աֆեյանը եւ Քարնեգի կորպորացիայի նախագահ Վարդան Գրեգորյանը: Մրցանակաբաշխության արարողությունը կայանալու է վաղը՝ ապրիլի 24-ին, Երեւանում: Հաղթողի անունը հրապարակելու է Ջորջ Քլունին:
