Լեւոն Տեր-Պետրոսյան-Սերժ Սարգսյան հանդիպումը տեղի է ունեցել արտաքին վտանգից, զինվորի կյանքից ելնելով, ոչ թե ներքաղաքական զարգացումներից: Այս մասին NEWS.am-ի հետ զրույցում ասել է ՀԱԿ խմբակցության քարտուղար Արամ Մանուկյանն` անդրադառնալով այս հանդիպման համատեքստում ներքաղաքական կանխատեսումներին:
«Ինձ բացարձակ չի հետաքրքրում ո՛չ ներքաղաքական զարգացումների հետ կապված հարցերը, ո՛չ էլ ռեյտինգի վերաբերյալ: Վտանգից, ամենալուրջ մարտահրավերից ու զինվորի կյանքի խնդրից ելնելով է տեղի ունեցել այդ քաղաքական հանդիպումը: Սա դրական արդյունք արդեն տվել է, մենք էլի կշարունակենք էս դաշտում զինվորի ոգին, մարտունակությունը ուժեղացնել: Մնացած դաշտերում սա ամենեւին չի տարածվում»,-ասել է Արամ Մանուկյանը:
Ինչ վերաբերում է այս հանդիպումից հետո ՀԱԿ-ի ուղղությամբ նախկին արտգործնախարար Վարդան Օսկանյանի թիմակիցների հարձակումներին, Մանուկյանն ասել է. «Այս պահին այդ խնդրի շուրջ ներքաղաքական տարաձայնությունները ձեռնտու չեն եւ չեն նպաստում զինվորի խնդրին, այդ առումով ես չեմ էլ մեկնաբանում Ձեր նշած հարցը: Այս պահին մեր ռեյտինգը իջել է, թե բարձրացել է, դա ինձ համար կարեւոր չէ: Լեւոն Տեր-Պետրոսյանի մոտեցումը մշտապես այսպիսին է եղել` արտաքին վտանգի դեպքում պատրաստ եմ ցանկացածին աջակցել Հայաստանի սուվերենությունը, անկախությունը պահելու համար»:
Արամ Մանուկյանը վստահեցրել է, որ հանրության կողմից դրական արձագանքի է արժանացել հանդիպումը:
