«Իրազեկ քաղաքացիների միավորում» ՀԿ փորձագետ, իրավաբան Կարեն Վարդանյանի սպանության մեջ մեղադրվող 43-ամյա Արթուր Միհրանյանը տեղափոխվել է «Նուբարաշեն» հոգեբուժական կլինիկա: Այս տեղեկությունը NEWS.am-ի հետ զրույցում հաստատեց մեղադրյալի պաշտպան Մարինե Ֆարմանյանը:
«Վարույթ իրականացնող մարմինը միջնորդել է դատահոգեբանական փորձաքննություն անցկացնել ստացիոնար ռեժիմով, միջնորդությունը բավարարվել է, իմ պաշտպանյալն այժմ «Նուբարաշեն» հոգեբուժական կլինիկայում է: Բուժման կուրսը 24 օր է, գուցեեւ ավելի շուտ դուրս գրվի»,-ասաց պաշտպանը:
Այն հարցին, թե Արթուր Միհրանյանի մոտ նկատելի՞ են ընդգծված հոգեկան շեղումներ,Մարինե Պարմանյանը պատասխանեց, որ առանձնապես ծանր հանցագործությունների դեպքում մեղադրյալները պարտադիր կերպով փորձաքննության են ենթարկվում:
«Փորձաքննությունից հետո պարզ կլինի՝ նա արարքը կատարելիս ինչ հոգեվիճակում է եղել, կորոշվի նրա մեղսունակության հարցը: Սա ընդունված պրակտիկա է»,-ասաց պաշտպանը:
Նշենք, որ Կարեն Վարդանյանը մարտի 17-ին Արաբական Միացյալ Էմիրություններ մեկշաբաթյա գործուղում մեկնելու նպատակով դուրս էր եկել տնից եւ չէր վերադարձել: Ապրիլի 1-ին պարզվել է, որ մարտի 17-ին Սեւանում բութ գործիքներով Կարեն Վարդանյանին բազմաթիվ հարվածներ են հասցրել եւ սպանել 43ամյա Արթուր Միհրանյանը եւ սպանվածի 23-ամյա հարեւան Գեւորգ Զոհրաբյանը, որից հետո Կարեն Վարդանյանի դին թաքցրել են Գեւորգ Զոհրաբյանին պատկանող, Երեւանի Սիսակյան փողոցի 22 շենքի հարակից ավտոտնակում: Արթուր Միհրանյանը եւ Գեւորգ Զոհրաբյանը ձերբակալված են: Քննությունը շարունակվում է:
Կարեն Վարդանյանի ընկերները պնդում են՝ նրան սպանել է հարեւանը, որը յուրացրել էր Երեւանի Լենինգրադյան փողոցում գտնվող նրա բնակարանը։ Նրանց խոսքով՝ սպանությունը կատարվել է խարդախությունը կոծկելու նպատակով: