Երեւանի Հալաբյան փողոցում ապրիլի 25-ին տեղի ունեցած պայթյունի ականատեսներից մեկը երկու պայթյուն է լսել: NEWS.am-ի հետ զրույցում Հալաբյան փողոցում գտնվող ավտոկանգառներից մեկի պահակը պատմել է, որ պայթյուններն այնքան ուժգին են եղել, որ այդ պահին ինքն աթոռից ընկել է:
«Երկու գմփուն լսվեց, նայեցի հետ, տենամ ավտոբուսն ա պայթել: Վազեցինք ավտոբուսի մեջ, բոլոր վիրավորները արնաքամ էին, երկու հոգի էլ մահացած էին»,-պատմել է նա:
Նշենք, որ պայթյունը տեղի է ունեցել Հալաբյան փողոցի թիվ 11 շենքի մոտ, թիվ 63 երթուղու «Բոգդան» մակնիշի ավտոբուսում։ Պայթյունն այնքան ուժգին է եղել, որ լսվել է մի քանի կիլոմետրից, հարեւան շենքերում ապակիներ են կոտրվել։
Ժամը 23.56-ի դրությամբ կա 7 տուժած՝ 1963 թ. ծնված Հասմիկ Սուրենի Մելքոնյան, 1979 թ. ծնված Անուշ Արշալույսի Եղիկյան, 1971 թ. ծնված Հարություն Նազարի Թերզյան, 2002 թ. ծնված Էդգար Արայիկի Գասպարյան, 2001 թ. ծնված Անահիտ Սարգսի Միքայելյան, 2001 թ. ծնված Ռոլանդ Սուրիկի Խոջայան, 1994 թ. ծնված Արթուր Վաչիկի Մարգարյան, ով տեղափոխվել է «Ճառագայթային բժշկության եւ այրվածքների գիտական կենտրոն», որտեղ ստանալով համապատասխան բուժօգնություն՝ դուրս է գրվել: Տուժածները ՀՀ քաղաքացիներ են:
Կա երկու զոհ, որոնց ինքնությունը չի հաղորդվում։