Facebook սոցիալական ցանցն առանձին հավելված է մշակում, որպեսզի օգտատերերն ավելի ակտիվ փոխանակեն իրենց լուսանկարներն ու տեսանյութերը, գրում է The Wall Street Journal-ը՝ վկայակոչելով իրավիճակին ծանոթ իր աղբյուրները։
Նրանց խոսքով՝ հավելվածի նախատիպը նման է Snapchat անհետացող լուսանկարների ծառայությանը։ Դրանից բացի, այն նախատեսում է օգտատերերի տեսագրությունները հեռարձակելու հնարավորություն տալ։
Նախագիծը վաղ փուլում է, եւ, հնարավոր է, այդպես էլ կյանքի չկոչվի։
Նոր նախագիծն արտահայտում է Facebook-ի մտահոգությունն առ այն, որ օգտատերերը սոցցանցում պասիվ են իրենց պահում։