2016-ի առաջին եռամսյակում Չինաստանն աշխարհում առաջին տեղն է զբաղեցրել DDoS-հարձակումների թվով, նրա մասնաբաժինը կազմել է 55,4 տոկոս, հայտնում է «Կասպերսկու Լաբորատորիան»:
Երկրորդ տեղը զբաղեցրել է Հարավային Կորեան 20,4 տոկոս մասնաբաժնով, իսկ երրորդ հորիզոնականը բաժին է հասել ԱՄՆ-ին` 9 տոկոս DDoS-հարձակումներով: Չորրորդ տեղը զբաղեցրած Ուկրաինայի տարբեր ռեսուրսների վրա հարձակումների թիվը 0,3-ից աճել է մինչեւ 2 տոկոս: Ռուսաստանը հայտնվել է հինգերորդ տեղում, հարձակումների մասնաբաժինը 2,1 տոկոսից կրճատվել է մինչեւ 1,9 տոկոս:
Կիբերհարձակումների են ենթարկվել աշխարհի 74 երկրի ռեսուրսներ, սակայն ինչպես անցյալ տարվա վերջին, մեծ մասը (գրանցված գրոհների 93,6 տոկոսը) բաժին է հասել տասը երկրի:
«Կասպերսկու լաբորատորիայի» փորձագետները նաեւ պարզել են, որ 2016 թվականին DDoS-գրոհների թիվը նվազել է, միաժամանակ աճում է դրանց հաճախությունը եւ բարդությունը: «Պարզ» գրոհները, որոնք ուղղված են կապուղիների խցանմանը, սկսել են չորս անգամ ավելի հազվադեպ տեղի ունենալ, բայց ավելացել է նրանց առավելագույն հզորությունը, որպեսզի ավելի հեշտորեն հաղթահարվի կիբերհանցագործություններից պաշտպանող պրովայդերների եւ ծրագրերի պաշտպանությունը:
Չարամիտները սկսել են ազդեցության համար ավելի բարդ թիրախներ ընտրել, օրինակ` տարբեր հավելվածներ: Այսպես, WordPress-ի կողմից կառավարվող կայքերի աշխատանքը խափանելու համար ցանցահենները Pingback տեխնոլոգիան են օգտագործում, որը ռեսուրսը ծանրաբեռնում է հսկայական թվով հարցումներով` այնպիսի կոնտենտներին հղումների պատճառով, որոնք հարցումներ են ուղարկում բնօրինակ կայքին: